«PARAHATDYR DIÝARYM, EZIZ TÜRKMENISTANYM» ATLY GÖÇME SERGI
«Halkara parahatçylyk we ynanyşmak» ýylymyzyň her bir güni göwünleri galkyndyrýan şanly wakalar, baýramçylyk dabaralary mynasybetli ýokary guramaçylykda geçirilýän çäreler bilen utgaşýar. Gahryman Arkadagymyz: «Halkara parahatçylyk we ynanyşmak ýyly» hem-de hemişelik Bitaraplygymyzyň 30 ýyllygy mynasybetli geçiriljek çäreleriň üsti bilen merdana halkymyzyň asylly däp-dessurlaryny, myhmansöýerligini, eziz Diýarymyzyň hemmetaraplaýyn gülläp ösýändigini we ynamly öňe barýandygyny bütin dünýä aýdyň görkezmelidiris» diýen röwşen manyly sözlerinden ugur alyp, Watanymyzyň şöhratly geçmişine buýsançly taryhyna, edebi mirasymyza söýgi döretmek we Halkara Nowruz baýramçylygyna bagyşlap Lebap welaýatynyň Taryhy we ülkäni öwreniş muzeýiniň gaznasynda saklanylýan milli gymmatlyklarymyzdan Türkmenabat Lukmançylyk orta hünär okuw mekdebinde «Parahatdyr Diýarym, eziz Türkmenistanym» atly göçme sergi gurnaldy.
Giňden ýaýbaňlandyrylan sergide gelin-gyzlarymyzyň on barmagyndan döräp, sungat derejesine ýeten haly we haly önümlerimiz, dokma hem-de Halkara Nowruz baýramyny dabaralandyrýan milli gymmatlyklarymyz öz beýanyny tapdy. Sergä tomaşa eden talyp ýaşlarymyzda halkymyzyň milli, mirasyna, medeniýetine hem-de sungatyna buýsanç duýgusyny döretmekde uly ähmiýetli boldy.
Toýlary-toýa ulaşýan Diýarymyzda ýylyň ýylyna däp bolup gelişi ýaly Lebap welaýat Taryhy we ülkäni öwreniş muzeýi her bir şanly senelerimiz, baýramçylyk dabaralary mynasybetli welaýatymyzyň edara kärhanalarynda, jemgyýetçilik guramalarynda, orta hünär okuw mekdeplerinde göçme sergileri gurnaýar. Milli we ruhy mirasymyz şöhlelendirýän muzeý gymmatlyklaryndan düzülen sergileriň üsti bilen halk köpçüligine wagyz edýäris. Milli gymmatlyklarymyzy öwrenmäge muzeý gymmatlyklaryny gorap saklamaga we ony halkyň arasynda wagyz etmäge döredip berýän ähli mümkinçilikleri, şertleri üçin türkmen halkynyň Milli Lideri Gahryman Arkadagymyza, Arkadagly Gahryman Serdarymyza köp sag bolsun aýdýarys. Goý Gahryman Arkadagymyzyň, Arkadagly Gahryman Serdarymyzyň janlary sag, belent başlary aman, tutýan tutumly işleri uly rowaçlyklara beslensin.