8-NJI MART HALKARA ZENANLAR GÜNI
Maşgalanyň sütüni ahlak gözelliginiň nusgasy hökmünde zenanlaryň, gelin-gyzlaryň mertebesini belent tutmak türkmen halkynyň gadymy döwürlerden gözbaş alyp gaýtýan milli ýörelgesidir. Watana il-güne , peder ojagyna wepaly , lebzi halal, zähmetsöýer gelin-gyzlarymyz biziň abraý mertebämizdir. Ata-babalarymyzyň «Ata sözi hikmet-ene sözi rehnet», «Gyz edebi-il edebi», «Gyzly öý-soltanly öý» diýen dürdäne sözleri türkmen halkynyň zenan mertebesiniň hormatynyň mydama belent tutulandygy subut edýär.
Türkmen halkynyň adynyň dünýä ýaýylmagynda, mertebesiniň beýgelmeginde gözbaşyny müňýyllyklaryň jümmüşinde alyp gaýdýan medeni mirasymyzyň, ajaýyp däp-dessurlarymyzyň asyrlar aşyp, biziň günlerimize gelip ýetmeginde eziz enelerimiziň mährem gelin-gyzlarymyzyň hyzmaty uludyr. Belent ruhly kämil nesli kemala getirmekde enelerimiz gelin-gyzlarymyz tarapyndan döredilen hüwdiler, läleler, monjukatdylar ýaly halk döredijiliginiň nusgalary ýaşlarda lebzi halallygy, watansöýjiligi, zähmetsöýerligi, ululary sylamagy, il-güne wepalylygy, belent ahlaklylygy terbiýeleýän türkmeniň ähli ýagşy gylyk-häsiýetlerini özünde jemleýän edep mekdebidir.