Türkmenistanyň B.Amanow adyndaky döwlet çagalar kitaphanasynyň agzybir hünärmenleri tomusky dynç alyş möwsüminiň dowam edýän günlerinde Gökderedäki “Beýik Serdaryň ruhubelent Nesilleri” çagalar sagaldyş we dynç alyş merkezinde Arkadagly Gahryman Serdarymyzyň “Änew – müňýyllyklardan gözbaş alýan medeniýet” atly kitabynyň many-mazmunyny, türkmen halkynyň şöhratly taryhyny, gadymy ýadygärliklerini, olar baradaky rowaýatlary ýaşlara giňişleýin wagyz etmek maksady bilen “Änew - ak bugdaýyň mekany” atly söhbetdeşlik geçirdi. Söhbetdeşligiň dowamynda Hormatly Prezidentimiziň bu ajaýyp eseriniň halkymyzyň şöhratly taryhyny hem-de baý medeni mirasyny giňden wagyz etmekdäki uly ähmiýeti barada nygtaldy. Şeýle-de kitapda beýan edilýän gadymy Änewiň taryhy, binagärlik ýadygärlikleri, Jeýtun medeniýeti, alymlar tarapyndan alnyp barylýan gözlegleriň netijesi barada buýsançly gürrüňler edildi. Kitaphananyň gurnan sergisi söhbetdeşlige gatnaşanlarda aýratyn täsir galdyrdy. Sergide Gahryman Arkadagymyzyň, Arkadagly Gahryman Serdarymyzyň gymmatly eserleri hem-de taryhy ýadygärliklerimiz baradaky dürli neşirler orun aldy.
Söhbetdeşligiň ahyrynda milli medeniýetimizi, sungatymyzy, şöhratly taryhymyzy, gadymy ýadygärliklerimizi ýaş nesillere giňişleýin wagyz etmäge döredip berýän giň mümkinçilikleri üçin Gahryman Arkadagymyza, Arkadagly Gahryman Serdarymyza alkyş sözleri beýan edildi.
