Lebap welaýat kitaphanasynda «Arkadagly Serdaryň dünýä uzan ak ýoly-halkara parahatçylyk we ynanyşmak ýyly» ady bilen döredijilik duşuşygy geçirildi. Duşuşyga gözel paýtagtymyzdan gelen «Biznes reklama» gazetiniň baş redaktory Seýitmyrat Geldiýew, «Watan» gazetiniň bölüm redaktory, Türkmenistanyň Prezidentiniň «Türkmeniň Altyn asyry» atly bäsleşiginiň ýeňijisi, şahyr Ogultäç Oraztaganowa, Türkmenistanyň medeniýet ministrliginiň Döredijilik işgärleri bölüminiň başlygynyň orunbasary Akmyrat Rejebow, Türkmenistanyň Magtymguly adyndaky milli sazly drama teatrynyň sahna ussady Türkmenistanyň at gazanan artisti Gülşirin Annamyradowa şeýle-de welaýatyň tanymal şahyrlary, döredijilik bilen meşhullanýan döredijilik işgärleri, talyp ýaşlar gatnaşdylar. Gatnaşyjylar welaýat kitaphanasynyň girelgesinde Türkmenistanyň hemişelik Bitaraplygynyň 30 ýyllygy mynasybetli «Bitaraplyk belent maksatlara ruhlandyrýar» atly giňişleýin kitap sergisini synlap, welaýatyň çagalar sungat mekdebiniň dutarçylar toparynyň çalyp beren sazlaryny diňläp, Türkmenabat şäheriniň çagalar çeperçilik mekdebiniň okuwçylarynyň çeken surat eserlerini synladylar, bu ýerde guralan sergiler, ýaňlanan dutaryň owazy olarda uly täsir galdyrandygy barada buýsanç bilen belläp geçdiler. Şeýle hem welaýat kitaphanasynyň çagalara niýetlenen otagynda kitaplaryň üsti bilen körpejeleriň watanymyzy wasp edýän şygyrlaryny diňlediler, şeýle-de çagalar türkmen ertekilerindäki gahrymanlaryň keşplerini janlandyryp, ertekileriň parçalary ýerine ýetirdiler. Çäräniň dowamynda gatnaşyjylar Baky Bitarap diýarymyzda döredijilikli zähmet çekmäge ähli mümkinçilikleri döredip beren türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza tüýs ýürekden çykýan alkyşlaryny beýan etdiler.
