DÜR DÖKÜLÝÄR ASMANDAN BU ZEMINE

Säher bilen mymyk şemal öwüsýär,
Pyntyk ýaran baglar ýaşyl öwüsýär,
Çagajyklar el çarpyşyp towusýar,
Dür dökülýär asmandan bu zemine.
***
Göýä dürüň dänesi deý damjalar,
Ak bulutlar çisňäp, çisňäp damjalar.
Ruhuň tämizlener, kalplar ynjalar,
Dür dökülýär asmandan bu zemine.
***
Baharyň ruh berýän bir jadysy bar,
Baglara guşlaryň jürküldisi ýar,
Şybyr-şybyr, göýä owaz edýär tar,
Dür dökülýär asmandan bu zemine.
***
Ak bulutlar sergezdandyr asmanda,
Gülüň ysy bark urýandyr çar ýanda,
Ynsanlaryň göwnün salyp heýjana,
Dür dökülýär asmandan bu zemine.
***
“Nowruzda geçiniň şahy ezilse”,
Hasylly gelermiş ýyl bu zemine.
Her damjasy ylham berip zehine,
Dür dökülýär asmandan bu zemine.

Ogultäç HOJANAZAROWA