Türkmenistanyň Bazar Amanow adyndaky Döwlet çagalar kitaphanasy ýakynda kitaphanamyzda hünär tejribeliligini geçýän «Türkmen Döwlet medeniýet we sungat» mekdebiniň talyp ýaşlary bilen hormatly Prezidentimiziň «Magtymguly –dünýäniň akyldary» atly gymmatly eseri esasynda «Jöwher zehiniň şuglasy» atly söhbetdeşlik geçirdi. Söhbetdeşligiň başynda kitaphana hünärmeni akyldar şahyrymyz Magtymguly Pyragynyň döredijilik dünýäsine goýulýan hormat-sarpanyň ähmiýeti we ajaýyp döwrümizde şahyryň goşgularynyň ýaş nesilleri terbiýelemekdäki orny babatynda täsirli gürrüňleri berdi. Kitapdan okalan bölekleri hem ýaşlar gyzyklanma bilen diňledi.
Söhbetdeşligiň ahyrynda türkmen söz sungatynyň pälwany Magtymguly Pyragynyň sarpasyny dünýä ýaýýan türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza alkyşlary beýan etdiler.
