«ÝYLLARYMYZYŇ ŞYGARY-ÝOLLARYMYZYŇ ÇYRAGY» ATLY BRINFING DUŞUŞYGY
Berkarar döwletiňiň täze eýýamynyň Galkynyşy döwründe eziz watanymyzda gazanylýan ösüşler ýurdumyzyň täze taryhyna altyn harplar bilen ýazylýar. Hormatly Prezidentimiziň taýsyz tagallalary netijesinde bedew batly beýik ösüşleri nazarlaýan ýurdumyzda Ahalteke bedewleriniň şan-şöhraty belent derejelere göterilýär. ,,At-myrat” diýen paýhasly jümläni döreden halkymyzyň nurana arzuwlaryny beýik maksatlaryny bedewler bilen baglanyşdyrypdyrlar. Gözelligiň, owadanlygyň, ýyndamlygyň naýbaşy nusgasy hökmünde ykrar edilen ahalteke bedewi halkymyzyň täze taryhy eýýamynda okgunly ösüşleriň baş nyşanyna öwrülýär. Şeýle sahawatly ýyllaryň şahyrana şygarlar bilen atlandyrylmagy bolsa, halkymyz üçin asylly däplere, dünýä döwletleri üçin oňyn çözgütlere öwrülýär. Hut şu ýylymyzyň şygarynyň bedewlerimiz bilen baglanyşykly atlandyrylmagy, ýylymyzyň bedew batly ösüşlere beslenjekdiginiň aýdyň subutnamasydyr. Şan-şöhrat bolup gelen ,,Garaşsyz, baky Bitarap Türkmenistan–bedew batly at-myradyň mekany” ýylynyň her bir güni uly ösüşlere, belent sepgitlere beslenýär.
Şu gün Lebap welaýatynyň Taryhy we ülkäni öwreniş muzeýinde Türkmenistanyň Kärdeşler arkalaşyklarynyň Lebap welaýatynyň Saýat etrap birleşmesiniň hem-de muzeýiň bilelikde gurnamagynda “Ýyllarymyzyň şygary-ýollarymyzyň çyragy” atly brinfing duşuşygy gurnaldy. Bu duşuşyk Saýat etrap bölüminiň Kärdeşler arkalaşyklarynyň, muzeý we bilim işgärleriň gatnaşmagynda geçirildi. Duşuşykda çykyş edenler halkymyzyň arassa ganatly behişdi bedewlerimizi ajaýyp döwrümiziň gözelligine görk goşýan maddy we ruhy baýlygymyzdygy, taryhda tutýan orny we tapylan tapyndylaryň arasynda bedewleriň keşpleri barada, olary ,,Asman atlary“, ,,Behişdi bedewler”, ,,Uçar ganatymyz” ýaly atlar bilen atlandyrylýandygyny belläp geçdiler. Hormatly Prezidentimiziň Arkadagly Gahryman Serdarymyzyň baştutanlygynda dünýäni haýrana goýýan türkmen halkymyzyň göz guwanjy uçar ganaty bolan ahalteke bedewlerimize çäksiz sarpa goýulýar. Bu babatda Arkadag şäherinde Aba Annaýew adyndaky Halkara atçylyk Akademiýasynyň açylyp ulanmaga berilmegi, Galkynyş milli at üstündäki oýunlar toparynyň gazanýan halkara ýeňişleri, ,,Ahalteke atçylyk sungaty we atlary bezemek däpleriniň” türkmen sungatynyň naýbaşy görnüşleriniň biri hökmünde ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilmegi milli we dünýä medeniýetiniň gudraty hasaplanýan Ahalteke bedewleriniň dünýädäki at-abaýyny has-da şöhratlandyrýandygy barada gyzykly söhbetler edildi.
Duşuşygyň barşynda Watanymyzyň bedew batly ösüşlerini pugtalandyrmakda, milli mirasymyza çäksiz sarpa goýýan, ýaş nesillerimizi Watançylyk ruhynda terbiýelemekde, şeýle hem Garaşsyzlygymyzyň 35 ýyllyk şanly toýuny mynasyp garşylamak ugrynda zähmet çekmekde uly mümkinçilikler döredip berýän türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza sagbolsunlar aýdyldy. Goý ýurdumyzda alnyp barylýan özgerişleriň her biri bedew batly ösüşlere beslensin!
___________________________
Ogulgerek Agajanowa
Lebap welaýatynyň Taryhy we ülkäni öwreniş muzeýiniň uly ylmy işgäri
