HABARLAR

Kategoriýalar
• Medeniýet habarlary we täzelikleri
• Täzelikler
• Konsertler
• Teatr we kino dünýäsi
• Muzeýler
• Kitaphanalar
• Taryhy ýadygärlikler
• Medeni miras
• Edebiýat älemi
• Halkara gatnaşyklary

TÜRKMENISTANYŇ GARAŞSYZLYGYNYŇ ŞANLY 34 ÝYLLYGYNA BAGYŞLANAN YKDYSADY ÜSTÜNLIKLERINIŇ SERGISI AÇYLDY

Muzeýler

19.09.2025

Türkmenistanyň Söwda senagat edarasynyň sergi merkezinde Türkmenistanyň Garaşsyzlygynyň şanly 34 ýyllygyna bagyşlanan ykdysady üstünlikleriniň sergisi açyldy. Türkmenistanyň Söwda senagat edarasy bilen ýurdymyzyň ministrlikleri hem-de pudak edaralary serginiň guramaçylary bolup çykyş etdiler. Sergi ministrlikleriň we pudak edaralarynyň hünärmenlerini, Senagatçylar we telekeçiler birleşmesiniň agzalaryny, türkmen işewürlerini, ýurdymyzyň raýatlaryny, şeýle hem daşary ýurt kompaniýalarynyň wekillerini jemledi. Türkmenistanyň Garaşsyzlygynyň 34 ýyllygyna bagyşlanyp gurnalan sergide medeniýet ministrliginiň pawilýonynda Türkmenistanyň Döwlet medeniýet merkeziniň Döwlet muzeýinde goralyp saklanylýan ajaýyp gymmatlyklar goýulan. Bu gymmatlyklar ýurdymyzyň syýasatyny beýan edýän zergärçilik eserleridir. Bu sungat eserleri türkmen halkynyň Milli Lideri, Türkmenistanyň Halk maslahatynyň başlygy Gahryman Arkadagymyza we Türkmenistanyň Prezidenti Arkadagly Gahryman Serdarymyza daşary ýurtly syýasy wekilleriniň hem-de ýurdumyzyň ministrlikleri tarapyndan sowgat berlen. Ata Watanymyzyň syýasatyny we paýtagtymyzdaky ajaýyp binalaryň görnüşini beýan edýän bu zergärçilik eserleriniň ählisi gymmat bahaly metallardan ýasalyp, gymmat bahaly daşlar bilen bezelipdir. Türkmenistanyň medeniýet ministrliginiň pawilýonynda Türkmenistanyň Döwlet çeperçilik akademiýasynyň göreldeli talyplary tarapyndan Gahryman Arkadagymyzyň we Arkadagly Gahryman Serdarymyzyň halkymyza peşgeş beren ajaýyp kitaplaryny beýan edýän sungat işleri görkezildi. Ykdysady üstünlikleriň sergisi öz işini 20-nji sentýabra çenli dowam eder.

TÜRKMEN SYÝAHATÇYLYK KOMPANIÝALARY TÄJIGISTANDAKY «DITE-2025» SERGISINЕ GATNAŞÝARLAR

Syýahatçylyk

19.09.2025

Türkmenistanyň öňdebaryjy syýahatçylyk kompaniýalary-«Eşretli syýahat», «Hazar Travel», «Jahana syýahat», «Gadymy Miras», «Halkara syýahat» we «Aşgabat syýahat» 18–20-nji sentýabr aralygynda Duşenbede geçirilýän «DITE-2025» halkara syýahatçylyk sergisine gatnaşýarlar. Bu barada Türkmenistanyň Täjigistandaky ilçihanasy habar berýär. Serginiň ekspozisiýasy myhmanlary Türkmenistanyň baý medeni mirasy, täsin taryhy ýadygärlikleri we tebigy gözellikleri bilen tanyşdyrýar we Türkmenistanyň syýahatçylyk mümkinçiliklerini giňden görkezýär. Serginiň çäklerinde geçirilen maslahatda türkmen wekilleri daşary ýurtlardan gelen kärdeşleri bilen duşuşyp, tejribe alyşmak, işewür gatnaşyklary berkitmek we täze bilelikdäki taslamalaryň mümkinçilikleri boýunça pikir alyşdylar. Täjigistanyň paýtagty Duşenbede penşenbe güni açylan DITE-2025 sergisine 200-den gowrak syýahatçylyk kompaniýa gatnaşýar. Olaryň 65-si daşary ýurt kompaniýalarydyr diýip, Täjigistanyň döwlet habarlar gullugy «Hovar» habar berýär.  

DUŞANBE ŞÄHERINDE HALKARA SYÝAHATÇYLYK MAÝA GOÝUM FORUMY GEÇIRILDI

Syýahatçylyk

19.09.2025

2025-nji ýylyň 17-nji sentýabrynda Duşanbe şäherinde «Syýahatçylyga strategiki maýa goýumlary arkaly ykdysady özgerişler» atly Syýahatçylyk maýa goýum forumy geçirildi. Türkmenistan ýurdyň wekilleri foruma işjeň gatnaşdy: gatnaşyjylar dürli ýurtlaryň hyzmatdaşlary bilen birnäçe duşuşyk geçirdiler, ýurduň syýahatçylyk mümkinçiliklerini paýlaşdylar we bilelikdäki taslamalar üçin mümkinçilikleri ara alyp maslahatlaşdylar. Forum diňe bir resmi çykyşlar meýdançasy bolman, eýsem tejribe alyşmak üçin täze mümkinçilikleri boldy. Senagatyň maýa goýumlarynyň özüne çekijiligine, durnukly syýahatçylygyň ösmegine we halkara hyzmatdaşlygynyň giňelmegine aýratyn üns berildi. Sahnanyň aňyrsynda ýüze çykan täze aragatnaşyklar, pikirler we başlangyçlar bilelikdäki taslamalaryň ýakyn wagtda durmuşa geçiriljekdigine we sebitiň syýahatçylyk pudagynyň ösüş üçin täze itergi berjekdigine umyt döredýär. 

GARAŞSYZLYK-WATANYMYZYŇ ŞÖHRATY

Muzeýler

19.09.2025

Berkarar döwletiň täze eýýamynyň Galkynyşy döwründe Gahryman Arkadagymyz, Arkadagly Gahryman Serdarymyz merdana türkmen halkynyň at owazasyny äleme ýaýdy, milletiň mertebesini parahatsöýüji, ynsanperwer halk hökmünde jümle-jahana ykrar etdi. Garaşsyzlyk halkyň arşa ganat açmasy, milletiň geçmişe-geljege ýaň salýan erkinlik hem-de parahatlyk mukamy bolup ýaňlanýar. Mukaddes Garaşsyzlygymyzyň 34 ýyllyk toýy mynasybetli Türkmenistanyň Şekillendiriş sungaty muzeýinde «Garaşsyzlyk-Watanymyzyň şöhraty» atly sergi guraldy. Sergide Türkmenistanyň halk suratkeşi Yzzat Gylyjowyň «Güýz aýdymy», Türkmenistanyň at gazanan işgäri Nyýazmyrat Dowodowyň «Meniň Watanym», Gennadiý Babikowyň «Aşgabat güýzi», Kakageldi Seýitmuhammedowyň «Garaşsyzlyk toýy» ýaly ajaýyp eserler sergimizde öz mynasyp ornuny tapdy. Ata Watanymyzy, mähriban halkymyzy aýdyň geljege, belent sepgitlere alyp barýan türkmen halkynyň milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlary sag bolsun, tutýan tutumly işleri rowaç bolsun! Gahryman Arkadagymyzy, Arkadagly Gahryman Serdarymyzy, ähli türkmen halkymyzy Garaşsyzlygymyzyň 34 ýyllyk toýy bilen tüýs ýüregimizden gutlaýarys. 

MUZEÝMIZDE GURNALAN GÖÇME SERGI

Muzeýler

19.09.2025

2025-nji ýylyň sentýabr aýynda Şanly Garaşsyzlyk baýramynyň öňsyrasynda Hydyr Derýaýew adyndaky mugallymçylyk mekdebi tarapyndan Türkmenistan Watanmyzyň Şanly Garaşsyzlygymyzyň 34 ýyllyk baýramy mynasybetli çäre geçirildi. Baýramçylyk çäresinde mugallymçylyk mekdebiniň talyp ýaşlary özleriniň folklýor çykyşlarynda türkmen halkynyň arzuwlap gelen Garaşsyzlygy Gahryman Arkadagymyzyň, Gahryman Arkadagly Serdarmyzyň saýasynda bahar-ýazly, aýdym-sazly Diýarymyzyň, bu günki -gün ösüşleri, Garaşsyzlygymyzyň miwesi bolan asuda, abadan Watan goýnunda garşy alýan her günümiziň bagtyýarlygy, özbaşdak millet hökmünde milli däp-dessurlarymyzyň, ýol-ýörelgelerimiziň, urp-adatlarymyzyň dabaralanmagy wasp edildi. Türkmen halky toý tutanda geçmişiň däp-dessuryna eýerip, uludan tutýar. Bu çärede Mary welaýatynyň taryhy we ülkäni öwreniş muzeýiniň ylmy işgärleri tarapyndan hem göçme sergi gurnaldy we milli mirasymyz bolan haly we haly önümleri, kümüş şaý-sepleriniň dürli görnüşleri, türkmen zenanlarynyň on barmagyndan çykan dürli nagyşlar bilen bezelen zenan lybaslary bolan keteni köýnekler, çabytdyr çyrpy-kürteler ýaly taryhy gymmatlyklaryň birnäçesi sergilendi. Talyp ýaşlaryň arasynda gurnalýan sergiler ata-babalarymyzyň Watany söýmegi öz ömürleriniň manysyna öwrüp, arzuw-umytlaryndan wysal bolan Garaşsyz, hemişelik Bitarap Türkmenistan döwletimiziň gelejegi bolan ýaş nesilleri ata-babalarymyzyň ýol-ýörelgeleri, däp-dessurlary bilen giňişleýin tanyşdyrmaga ýol açýar. _____________ SEÝIDOWA G. Muzeýiň uly ylmy işgäri

TOMAŞA JAÝLARYNDAKY TÄSIRLI ÇYKYŞLAR

Teatr we kino dünýäsi

19.09.2025

Halkara parahatçylyk we ynanyşmak ýylynyň belent ruhunda geçiriljek Türkmenistanyň Halk Maslahatynyň mejlisine gatnaşyjylar üçin medeni çäreleriň baý maksatnamasy taýýarlanyldy. Halk Maslahatynyň mejlisine gatnaşyjylar 17-nji sentýabrda Baş akademiki drama teatrynda «Mukaddeslige tagzym» atly sahna oýnuna tomaşa etdiler. Gahryman Arkadagymyzyň «Enä tagzym-mukaddeslige tagzym» atly gymmatly eseri esasynda sahnalaşdyrylan bu oýun tomaşaçylar-da ýatdan çykmajak täsir galdyrdy. Eserde enä bolan söýgi Watana bolan söýgi bilen sazlaşyklylykda beýan edilýär. Teatrlarymyzyň döredijilik toparlarynyň her bir baýramçylyga sowgatly gelmek ýaly asylly däbi bar. Bellemeli zatlaryň ýene biri, olar edebiýatymyzda, sungatymyzda mynasyp yz goýan şahsyýetlerimizi mertebeläp, olar hakda sahna eserlerini döredýärler. Mundan öň olar kompozitor Nury Halmämmedow hem-de meşhur sahna ussady Sabyr Ataýewa hakdaky eserler bilen tomaşaçylary begendirdiler. Golaýda bolsa, Magtymguly adyndaky milli sazly drama teatrynda şahyr Gurbannazar Ezizowa bagyşlanan «Gurbannazar Ezizow» atly sahna oýnuny taýýarladylar. Döwletli geňeşe gatnaşyjylar bu sahna oýnuna hem tomaşa etdiler. Medeni çäreleriň arasynda Türkmenistanyň Döwlet sirkinde guralan «Galkynyş» milli at üstündäki oýunlar toparynyň hem-de sirk artistleriniň şowhunly çykyşlary hem bu ýere ýygnananlara ruhy lezzet paýlady. 

PAÝTAGTYMYZDA TÜRKMENISTANYŇ YKDYSADY ÜSTÜNLIKLERINIŇ SERGISI ÖZ IŞINE BAŞLADY

Täzelikler

19.09.2025

18-nji sentýabrda paýtagtymyzda ýurdumyzyň Garaşsyzlygynyň 34 ýyllygy mynasybetli Türkmenistanyň ykdysady üstünlikleriniň sergisi öz işine başlady. Milli ykdysadyýetimiziň pudaklarynyň ösüşini, ýurdumyzda durmuşa geçirilýän giň möçberli syýasy-jemgyýetçilik, medeni-ynsanperwer özgertmeleri şöhlelendirýän bu forum her ýyl Garaşsyzlyk baýramynyň öňüsyrasynda geçirilýär. Söwda-senagat edarasynyň binasynda ýaýbaňlandyrylan serginiň açylyş dabarasyna Mejlisiň Başlygy, Ministrler Kabinetiniň Başlygynyň orunbasarlary, ministrlikleriň, pudaklaýyn dolandyryş edaralarynyň, daşary ýurtlaryň hem-de halkara guramalaryň Türkmenistanda işleýän diplomatik wekilhanalarynyň, Türkmenistanyň Halk Maslahatynyň mejlisine gatnaşmak üçin ýurdumyzyň ähli welaýatlaryndan, Aşgabat we Arkadag şäherlerinden gelen wekiller, jemgyýetçilik guramalarynyň, köpçülikleýin habar beriş serişdeleriniň ýolbaşçylary, ýurdumyzyň işewür toparlarynyň wekilleri gatnaşdylar. Bu ýerde sungat ussatlarynyň ýerine ýetiren çykyşlary dabara aýratyn öwüşgin çaýdy. Soňra hormatly Prezidentimiz Serdar Berdimuhamedowyň sergä gatnaşyjylara iberen Gutlagy okaldy. Döwlet Baştutanymyz Gutlagynda mizemez türkmen döwletiniň berkararlygynyň-mukaddes Garaşsyzlygymyzyň 34 ýyllyk döwrüniň içinde gazanan üstünliklerini, ýeten belent sepgitlerini dünýä jemgyýetçiligine açyp görkezmek maksadyndan ugur alnyp geçirilýän bu serginiň uly üstünliklere beslenjekdigine ynam bildirip, ýurdumyzy durmuş-ykdysady taýdan ösdürmekde ýetilen sepgitleriň we gazanylan üstünlikleriň geljegiň röwşen ýollaryny gurmagyň mizemez binýadydygyny belleýär. Şunuň bilen baglylykda, bu ýörelgeden ugur alnyp, milli ykdysadyýetimizi mundan beýläk-de durnukly ösdürmäge aýratyn ähmiýet berilýär, öňdebaryjy tehnologiýalar bilen enjamlaşdyrylan iri senagat toplumlary döredilýär, ähli pudaklary döwrebaplaşdyrmak hem-de sanly ulgama geçirmek ugrundaky işler üstünlikli dowam etdirilýär. Hormatly Prezidentimiziň Gutlagy uly üns bilen diňlenildi. Serginiň açylyş dabarasyna gatnaşyjylar, ilki bilen, ýurdumyzyň Garaşsyzlyk ýyllarynda gazanan üstünliklerini, durmuşa geçirilen özgertmeleri, halkymyzyň abadan durmuşy ugrunda alnyp barylýan işleri şöhlelendirýän wideoşekillere tomaşa etdiler. Soňra myhmanlar sergi bilen tanyşdylar. Sergide Aşgabat we Arkadag şäherleriniň, ýurdumyzyň welaýatlarynyň häkimlikleriniň diwarlyklary ýaýbaňlandyrylypdyr. Her pawilýon diňe bir sergi meýdançasy bolmak bilen çäklenmän, eýsem, Watanymyzyň şäherleriniň we sebitleriniň durmuş-ykdysady ösüşiniň beýanydyr. Olarda ýerleşdirilen monitorlarda sebitleriň özboluşly aýratynlyklaryny, senagat kuwwatyny, dürli ugurlar boýunça gazanýan üstünliklerini, medeni durmuşyny şöhlelendirýän şekiller görkezilýär. Hususan-da, Berkarar döwletiň täze eýýamynyň Galkynyşy döwrüniň ösüşleriniň nyşanyna öwrülen Arkadag şäheriniň diwarlygy myhmanlarda aýratyn gyzyklanma döretdi. Häzirki wagtda «akylly» şäheriň gurluşygynyň ikinji tapgyry batly depginde dowam edýär. Diwarlykda ýerleşdirilen monitorda şäheriň taslamasynyň durmuşa geçirilmeginiň çäklerinde amala aşyrylan işler barada gürrüň berilýär. «Türkmenistan gazeti»

TÜRKMENISTANYŇ GARAŞSYZLYGYNYŇ 34 ÝYLLYGY MYNASYBETLI ÝURDUMYZYŇ YKDYSADY ÜSTÜNLIKLERINIŇ SERGISI

Täzelikler

18.09.2025

Berkarar döwletiň täze eýýamynyň Galkynyşy döwri bedew bady bilen ösýän asuda, abadan ýurdumyzyň guwandyryjy ösüşleriniň we şan-şöhratynyň dünýä dolýan döwrüdir. Bagtyýar halkymyz Halkara parahatçylyk we ynanyşmak ýylynyň milli we halkara ähmiýetli wakalaryny özünde jemleýän Garaşsyzlygymyzyň 34 ýyllygy hem-de hemişelik Bitaraplygymyzyň 30 ýyllygyna zähmet ýeňişleri bilen barýar. Gahryman Arkadagymyz: Mukaddes Garaşsyzlygymyzyň gymmaty hakynda «Garaşsyzlygymyz–barlygymyz. Garaşsyzlygymyz–bagtymyz» diýip belleýär. Şu jähetden, Garaşsyzlyk–biziň eziz Watanymyza söýgümizi we sarpamyzy Ýer ýüzünde giňden dabaralandyrýan, halkymyzyň berkarar döwlet gurmak, agzybirlik, özbaşdaklyk, hemişelik Bitaraplyk barada telim asyrlyk arzuw-maksatlaryndan bina bolan mukaddes gymmatlygymyzdyr.  Häzirki wagtda ýurdumyzyň her bir güni toý baýramlara beslenýär. 2025-nji ýylyň 18-nji sentýabrynda şanly Garaşsyzlygymyzyň 34 ýyllygy baýramynyň öňüsyrasynda Türkmenistanyň Söwda-senagat edarasynda Türkmenistanyň Garaşsyzlygynyň 34 ýyllygy mynasybetli ýurdumyzyň ykdysady üstünlikleriniň sergisiniň açylyş dabarasy geçirildi. Bu sergide Türkmenistanyň Döwlet çeperçilik akademiýasynyň naýbaşy eserleri hem görkezildi. Sungat ojagymyzyň Amaly-haşam sungatynyň zergärçilik, külalçylyk, halyçylyk, binagärlik we dizaýn ugurlary boýunça döredilen eserler, ýaş zehinleriň pikirlerini, arzuwlaryny we duýgularyny giňişleýin beýan edýär. Ýurdumyzyň belent sepgitlerini, aýdyň geljege gönükdirilen ynamly maksatlaryny, asuda, parahat durmuşymyzyň ýyl saýyn özgerýän keşbini wasp edýän sungat eserleri sergä baran myhmanlarda uly gyzyklanma döretdi. Türkmenistanyň Söwda-senagat edarasynda ussat mugallymlarymyz we ýaş zehinli talyplarymyz bu serginiň ähmiýeti dogrusynda özleriniň ýürek buýsançlaryny wagyz işlerinde beýan etdiler. Türkmen halkynyň asyrlar aşyp gelen baý medeni mirasyny, gadymy gymmatlyklaryny, milli sungatyny gorap saklamak, kämilleşdirmek, giňden wagyz etmek ugrunda ajaýyp mümkinçilikleri döredýän Gahryman Arkadagymyza, Arkadagly Gahryman Serdarymyza tüýs ýüregimizden buýsanjymyzy beýan edýäris. ______________________ Oguljan ANNAMÄMEDOWA, Türkmenistanyň Döwlet çeperçilik akademiýasynyň «Sungaty öwreniş» kafedrasynyň 3-nji ýyl talyby

WATANYM–BAGTYM, GARAŞSYZLYK–GANATYM

Kitaphanalar

18.09.2025

WATANYM–BAGTYM, GARAŞSYZLYK–GANATYM Aşgabat şäher medeniýet müdirliginiň Merkezleşdirilen kitaphanalar ulgamynyň Kerim Gurbannepesow adyndaky kitaphana şahamçasy bilen Aşgabat şäher Baş bilim müdirliginiň 132-nji daşary ýurt dillerini ýöriteleşdirilen orta mekdebiniň bilelikde guramagynda mukaddes Garaşsyzlygymyzyň 34 ýyllygy mynasybetli «Watanym–bagtym, Garaşsyzlyk–ganatym» ady bilen aýdym-sazly wagyz-nesihat çäresi geçirildi. Çärede çykyş edenler mähriban halkymyz Garaşsyzlyk gününe bagtyýarlygyň, berkararlygyň beýik baýramy hökmünde aýratyn sarpa goýýandygy, Garaşsyzlyk ýurdumyzy taryhy özgerişlere besläp, parahatçylyk söýüji agzybir halkymyzy ajaýyp döwre, bagtyýar durmuşa ýetirendigi barada bellediler. Şeýle hem Mukaddes Garaşsyzlygymyzyň şanly 34 ýyllyk baýramynyň bellenilýän ýylynda türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň taýsyz tagallalary bilen parahatçylygyň, ruhubelentligiň ýurdy hökmünde Watanymyzyň dünýä ýaň salýan beýik şan-şöhratynyň, halkara abraýynyň artýandygyna şaýatlyk edýän wakalar halkymyzy beýik üstünliklere ruhlandyrýandygy barada gürrüň berdiler. Çäräniň dowamynda Aşgabat şäher Baş bilim müdirliginiň 132-nji daşary ýurt dillerini ýöriteleşdirilen orta mekdebiniň okuwçylarynyň ýerine ýetirmeginde aýdym-sazlar ýaňlandy. Aýdym-sazly wagyz-nesihat çärä gatnaşanlar eşretli eýýamyň gujagynda azat-erkin ýaşap, halal zähmet çekmäge giň mümkinçilikleri döredýän Gahryman Arkadagymyzyň, Arkadagly Gahryman Serdarymyzyň janlarynyň sag, belent başlarynyň aman bolmagyny, durmuşa geçirýän beýik işleriniň hemişe rowaçlyklara beslenmegini arzuw etdiler. 

TÜRKMENISTANYŇ HALK MASLAHATYNA GATNAŞYJYLARYŇ MUZEÝE GEZELENJI

Muzeýler

18.09.2025

Berkarar döwletiň täze eýýamynyň Galkynyşy döwründe halkymyz hemişelik Bitarap Diýarymyzyň Garaşsyzlyk toýuny uly zähmet üstünliklerine besläp, buýsanç bilen garşy alýar. Halkara parahatçylyk we ynanyşmak ýylynda hem şanly Garaşsyzlygymyzyň 34 ýyllygynyň bellenilýän günleriniň öňüsyrasynda Türkmenistanyň Halk Maslahatynyň mejlisi geçirilýär. Bu iri jemgyýetçilik-syýasy çärä gatnaşyjylar 18-nji sentýabrda Türkmenistanyň Döwlet medeniýet merkeziniň Döwlet muzeýine geldiler we muzeýiň ekspozisiýalaryna aýlanyp gördüler. Döwlet muzeýiniň işgärleri ýurdumyzyň ähli künjeklerinde Türkmenistanyň Halk Maslahatynyň mejlisine gatnaşmaga gelen myhmanlary ýokary derejede garşyladylar. Myhmanlara Döwlet muzeýiniň ekspozisiýalarynda görkezilýän gymmatlyklar barada muzeýiň hünärmenleri giňişleýin ekskursiýalary berdiler. Türkmenistanyň Halk Maslahatynyň mejlisine gatnaşmaga gelen myhmanlar Döwlet muzeýiniň her bir bölümlerinde görkezilýän gymmatlyklary gyzyklanma bilen synladylar.

• ←
• 1
• ...
• 194
• 195
• 196
• ...
• 244
• →