HABARLAR

Kategoriýalar
• Medeniýet habarlary we täzelikleri
• Täzelikler
• Konsertler
• Teatr we kino dünýäsi
• Muzeýler
• Kitaphanalar
• Taryhy ýadygärlikler
• Medeni miras
• Edebiýat älemi
• Halkara gatnaşyklary

BITARAPLYGYMYZYŇ ŞANLY 30 ÝYLLYGYNA BAGYŞLANAN KONSERT

Konsertler

28.11.2025

Berkarar döwletimiziň täze eýýamynyň galkynyşy döwründe, Gahryman Arkadagymyzyň, Arkadagly Gahryman Serdarymyzyň saýasynda her bir günümiz toýdur-baýramlara, şanly senelere beslenýär. Bitaraplygymyzyň şanly 30 ýyllyk baýramçylygyna bagyşlanan konsertler ýurdumyzyň çar künjeginde uly dabara bilen geçilýär. Maýa Kulyýewa adyndaky Türkmen milli konserwatoriýasy bilen Halkara senagatçylar we telekeçiler uniwersitetiniň bilelikde gurnan joşgunly konserti munuň aýdyň subutnamasy boldy. Konsert Maýa Kulyýewa adyndaky Türkmen milli konserwatoriýasynyň kamera orkestriniň ýerine ýetirmeginde, Türkmenistanyň Prezidentiniň yglan eden “Türkmeniň Altyn asyry” bäsleşiginiň ýeňijisi Döwletmämmet Ökdirowyň dirižorluk etmeginde zehinli türkmen kompozitory Rejep Rejepowyň Tans kinofilminden “Конец ночного вора” sazy bilen açyldy. Konsertiň dowamynda türkmen we daşary ýurt aýdymdyr sazlary uly joşgun bilen ýerine ýetirildi. Olardan: Güljemal Taýlyýewanyň ýerine ýetirmeginde Анна Герман “Кажется”, O. Berdiýewiň sazyna, T. Söhbetowyň sözüne Kadyr Esenowyň ýerine ýetirmeginde “Ýatla meni”, Munisa Gudaýberebowanyň ýerine ýetirmeginde Indila “Love story”, “Keremli söz” kinofilminden Mergen Janmyradowyň ýerine ýetireginde Keremiň aýdymy “Daglar”, orkestriň ýerine ýetirmeginde L.W. Bethoweiň “Für Elise Jam”, Çynar Gutlyýewanyň ýerine ýetirmeginde Nansy Ajramyň “Inta Eýh” eseri, Nazar Garaýewiň ýerine ýetirmeginde Nury Halmämmedowyň sazyna, Gurbannazar Ezizowyň goşgusyna “Iki agaç”, Türkmenistanyň Prezidentiniň yglan eden “Türkmeniň Altyn asyry” bäsleşiginiň ýeňijisi Begenç Moşşiýewiň ýerine ýetirmeginde R. Musumarra “ Luna Tu”, Begenç Moşşiýew bilen Güljemal Taýlyýewanyň bilelikde ýerine ýetirmeginde Aleksandro Safina “Suraý Kui”, Myrat Mämmetmyradowyň ýerine ýetirmeginde T. Artykowyň sazyna we sözlerine “Ýüregim sende”, Humaý Kakaýewanyň ýerine ýetirmeginde Azerbaýjan halk aýdymy “Sary gelin”, kamera orkestriniň ýerine Karl Jenkinsiň “Palladio” eserleri ýaňlady. Dabaraly geçen konsert Halkara senagatçylar we telekeçiler uniwersitetiniň talyplarynyň ýerine ýetirmeginde Alkyşnama bilen jemleni. Bu Alkyşnama talyp ýaşlaryň Gahryman Arkadagymyza, Arkadagly Gahryman Serdarymyza çäksiz alkyşlarynyň nyşany bolup ýaňlandy. Aýläle Gulmuradowa Maýa Kulyýewa adyndaky Türkmen milli konserwatoriýasynyň “Kompozisiýa” hünäriniň II ýyl talyby

«BITARAP TÜRKMENISTAN–PARAHATDYR BU MEKAN» ATLY AÝDYM-SAZLY KONSERTI

Konsertler

28.11.2025

Söhbediňe diň salýar bar halaýyk, Aýdany, aýdymy göwne ylaýyk. Bilmezmiň Beýigňi gudrat saýyp, Şudur Bitaraplyk, eziz Watanym! *** Bitaraplyk taglymaty–dünýä döwletleri bilen ylalaşykly ýaşamak diýmekdir. Bitaraplyk ýaş türkmen döwletiniň gülläp ösmegi üçin badalga boldy. Parahatçylygy we durnuklylygy saklaýan türkmen döwletimiz ykdysadyýet, medeniýet we beýleki ulgamlaryň ählisi boýunça çalt depginler bilen ösýär. Parahat we asuda ýurdumyzda şanly senelere bagyşlanan toý-dabaralary ähli ýokary okuw jaýlarynda-da giňden dabaralanýar. “Halkara parahatçylyk we ynanyşmak ýyly” we Bitaraplygyň 30-ýyllygy mynasybetli Maýa Kulyýewa adyndaky Türkmen milli konserwatoriýasy hem-de Myrat Garryýew adyndaky Türkmenistanyň Döwlet lukmançylyk uniwersiteti bilen bilelikde gurnamagynda kamera orkestriniň we aýdymçy talyplaryň “Bitarap Türkmenistan-parahatdyr bu mekan” atly aýdym-sazly konserti geçirildi. Konsertde bagtyýar talyp ýaşlaryň we zehinli mugallymlaryň ýerine ýetirmeginde daşary ýurt hem-de türkmen kompozitorlaryň meşhur eserleri ýaňlandy. Konserdiň başynda kamera orkestriniň ýerine ýetirmeginde Tans kinofilminden “Конец ночного вора”, Güljemal Taýlyýewanyň ýerine ýetirmeginde “Кажется”, Kadyr Esenowyň ýerine ýetirmeginde “Ýatla meni”, Munisa Hudaýberenowanyň ýerine ýetirmeginde “Love story”, “Lose control”, kamera orkestriň ýerine ýetirmeginde “Für Elise Jam”, “Palladio”, Çynar Gutlyýewanyň ýerine ýetirmeginde “Inta Eýh”, “What a wonderful world”, Nazar Garaýewiň ýerine ýetirmeginde “Iki agaç”, Begenç Moşşiýewiň ýerine ýetirmeginde “Luna Tu”, Güljemal Taýlyýewanyň we Begenç Moşşiýewiň ýerine ýetirmeginde “Saraý Kui”, Myrat Mämmetmyradowyň ýerine ýetirmeginde “Ýüregim sende”, Humaý Kakaýewanyň ýerine ýetirmeginde Azerbeýjan halk aýdymy “Sary gelin” ýaly aýdymdyr-sazlar ýerine ýetirildi. Konsertiň ahyrynda Myrat Garryýew adyndaky Türkmenistanyň Döwlet lukmançylyk uniwersitetiniň talyplarynyň ýerine ýetirmeginde “Alkyşnama” ýaňlandy. “Bitarap Türkmenistan-parahatdyr bu mekan” atly aýdym-sazly konsert örän şowhunly we täsirli geçdi. Şunuň ýaly konsertleri, aýdym-sazly dabaralary geçirmäge giň mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň ýurdumyzyň geljegi üçin alyp barýan işleri mundan beýläk hem rowaçlyklara beslensin. ______________ Aýnur Nuryýewa Maýa Kulyýewa adyndaky TMK-nyň “Sazşynaslyk” fakultetiniň IV ýyl talyby

SYÝAHATÇYLYK ULGAMYNDA NETIJELI IŞLER

Syýahatçylyk

28.11.2025

Özbegistan Respublikasynyň Daşkent şäherinde “Merkezi Aziýa-Ýewropa Bileleşigi” syýahatçylyk forumy öz işini dowam edýär. Bu syýahatçylyk forumy Özbegistanyň halkara syýahatçylyk hepdeliginiň çäginde geçirilýär. Halkara forum Merkezi Aziýa döwletleriniň we Ýewropa Bileleşiginiň bilelikde tejribelerini paýlaşmaklaryna we syýahatçylyk ulgamyny ösdürmeklige gönükdirilendir. Şeýle-de forumyň çäklerinde Daşkendiň sebitdäki iň uly syýahatçylyk sergilerinden biri bolan TITF (Daşkent halkara syýahatçylyk ýarmarkasy) geçirilýär. Bu sergä “Aýan”, “DnTours”, “Trawelco”, “Syýahatçy”, “Hazar Travel”, “Gadymy Miras”, “Dekor Türkmenistan” we beýleki pudak wekilleri ýaly öňdebaryjy türkmen syýahatçylyk kompaniýalary hem gatnaşýar. Sergä gelýän myhmanlar Türkmenistanyň baý medeni mirasy, özboluşly tebigy we taryhy ýadygärlikleri bilen içgin tanyşýarlar. Geçirilýän halkara ähmiýetli çäreler halkara gatnaşyklarynyň has-da berkemeginde we hyzmatdaşlygyň ösdürilmeginde möhüm ädimleriň biridir.  

«ÝEREWAN: MEDENI ÇATRYK» ATLY HALKARA MASLAHATY

Halkara gatnaşyklary

28.11.2025

27-nji noýabrda Ermenistan Respublikasynyň Ýerewan şäherinde ÝUNESKO-nyň «Medeni taýdan özüňi görkezmegiň dürlüligini goramak we höweslendirmek» hakyndaky Konwensiýasynyň kabul edilmeginiň 20 ýyllygy mynasybetli geçirilýän «Ýerewan: medeni çatryk» atly halkara maslahat öz işine başlady. Bu foruma ÝUNESKO-nyň we beýleki halkara guramalaryň wekilleri bilen birlikde, ondan gowrak ýurduň wekiliýetleri ýygnandy. Bu çärä Türkmenistanyň Medeniýet ministrliginiň wekilleri hem gatnaşýar. Matenadaran şäherindäki Maştots adyndaky gadymy golýazmalar ylmy-barlag institutynda halkara konferensiýasynyň açylyş dabarasy boldy. Dabaradan soň, 2005-nji ýyldaky Konwensiýany durmuşa geçirmegiň netijelerine we mümkinçiliklerine bagyşlanan umumy mejlis öz işine başlady. Mejlisiň maksatnamasy sanly döwürde döredijilik pudaklarynyň ösüşi we medeni beýanyň aýratynlyklary baradaky pikir alyşmalary öz içine aldy. Ermenistan Respublikasyna saparyň çäginde türkmen wekiliýeti Matenadaran muzeýine baryp, gadymy golýazmalaryň özboluşly toplumy bilen tanyşdy. _____________________ Maddy däl medeni miras müdirligi

ARHEOLOGIK GAZUW-AGTARYŞ IŞLERINIŇ NETIJESINDE ÝÜZE ÇYKARYLAN TARYHY TAPYNDYLARY MUZEÝ GAZNASYNA TABŞYRMAK DABARASY

Muzeýler

28.11.2025

2025-nji ýylyň 21-nji noýabrynda hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda döwlet durmuşyna degişli birnäçe meselelere seredildi. Şol mejlisde Hormatly Prezidentimiz halkymyzyň baý medeni mirasyny giňden öwrenmegiň, gorap saklamagyň, dikeltmegiň we wagyz etmegiň möhüm wezipeleriň biri bolup durýandygyny belledi. Şunuň bilen baglylykda, döwlet Baştutanymyz ýurdumyzyň taryhy-medeni ýadygärliklerini ylmy taýdan öwrenmek we geljek nesillere ýetirmek boýunça alnyp barylýan işleri mundan beýläk-de dowam etdirmek barada hem tabşyryk berdi. Arkadagly Gahryman Serdarymyzyň tabşyryklaryndan ugur alyp Ýurdumyzyň taryhy-medeni ýadygärliklerinde geçirilen arheologik ylmy-barlaglaryň netijesinde dürli döwürlerde ýüze çykarylan tapyndylary bu gün Arkadag şäheriniň Taryhy we ülkäni öwreniş muzeýine tabşyrmak dabarasy geçirilýär. Türkmenistanda gadymy arheologik we arhitektura ýadygärliklerini gorap saklamak hem-de geljek nesillere ýetirmek üçin döwlet taryhy-medeni goraghanalar döredildi. Ýurdumyzyň muzeýlerinde maddy we medeni mirasymyzy toplamak, olary ylmy esasda öwrenmek, milli mirasymyzy halkymyza, şeýle hem dünýä ýüzüne ýaýmak boýunça giň gerimli işler alnyp barylýar. Halkymyzyň arasynda saklanyp galan taryhy-medeni we tebigy gymmatlyklary ýüze çykarmak, öwrenmek, durkuny saklamak, rejelemek işleri muzeýlerimiz tarapyndan hem yzygiderli amala aşyrylýar. Türkmen topragy adamzat medeniýetiniň, siwilizasiýasynyň ilkinji ojaklarynyň biri hasaplanylýar. Ata Watanymyz şöhratly geçmişimiziň gönüden-göni şaýatlary bolup durýan arheologik ýadygärliklere juda baýdyr. Şol ýadygärlikler köp ýyllardan bäri diňe bir türkmen arheologlarynyň däl, eýsem, dünýäniň meşhur taryhçylarynyň, syýahatçylarynyň hem ünsüni çekip gelipdir. Ata Watanymyz iň gadymy topragyň biri bolup, onuň medeniýetiniň we sungatynyň täsiri jümle-jahana ýaýrapdyr. Türkmen topragynyň gadymy ýadygärlikleriniň köpüsiniň üstünden ençeme asyr geçip, olaryň ajaýyplygy adamlary haýran galdyrýar. Türkmenistanyň Taryhy we medeni ýadygärlikleri goramak, öwrenmek hem-de rejelemek baradaky milli müdirliginiň ýolbaşçylygynda Ahal welaýatynyň çäklerindäki taryhy ýadygärliklerde arheologiýa gazuw-barlag işleriniň netijesinde tapylan taryhy tapyndylaryň 182 sanysy, Türkmenistanyň Ylymlar akademiýasynyň Taryh we arheologiýa institutyndan 20 sanysy Arkadag şäheriniň taryhy we ülkäni öwreniş muzeýine tabşyryldy we muzeýiň ekspozisiýasynda sergilenip bu günki gün halk köpçüligine hödürlenýär. Dabarada Taryhy we medeni ýadygärlikleri goramak, öwrenmek hem-de rejelemek baradaky milli müdirligiň hünärmenleri, «Nusaý», «Abiwerd», «Köne Sarahs», «Gökdepe» taryhy-medeni döwlet goraghanalarynyň hünärmenleri, Türkmenistanyň Ylymlar akademiýasynyň Taryh we arheologiýa institutynyň ylmy işgärleri, «Gökdepe» milli muzeýiniň, «Watan mukaddesligi» muzeýiniň hünärmenleri, Aba Annaýew adyndaky Halkara atçylyk akademiýasynyň, Berdimuhamet Annaýew adyndaky Arkadag şäher mugallymçylyk orta hünär okuw mekdebiniň, Sahy Jepbarow adyndaky Arkadag şäher ýörite sungat mekdebiniň, Saçly Dursunowa adyndaky Arkadag şäher lukmançylyk orta hünär okuw mekdebiniň talyplary, Arkadag şäheriniň Jemgyýetçilik guramalarynyň işjeň agzalary gatnaşdylar we çykyş etdiler. Türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň halkymyzyň baý medeni mirasyny giňden öwrenmekde, gorap saklamakda, dikeltmekde we wagyz etmekde, ýurdumyzyň taryhy-medeni ýadygärliklerini ylmy taýdan öwrenmek, geljek nesillere ýetirmekde we dünýä ýaýmakda ýurdumyzyň muzeýleri üçin döredip berýän mümkinçiliklerine çäksiz sag bolsunlarymyzy aýdýarys.

ASMAN GIŇIŞLIGINE KEŞT EDIP...

Kitaphanalar

28.11.2025

Döwletmämmet Azady adyndaky Arkadag şäher kitaphanasynda Halkara senagatçylar we telekeçiler uniwersitetiniň talyp ýaşlaryna «Asman giňişligine keşt edip...» atly gürrüňdeşlik geçirildi. Diýarymyzyň çäginde gadym wagtlarda hem astronomiýa ylmyna uly üns berlipdir. Muňa gadymy Merwiň dünýä belli kitaphanasy hakdaky maglumatlar şaýatlyk edýär. Türkmenistanyň çäginde ilkinji obserwatoriýalar Nusaýda we gadymy Merwde gurnalyp, olarda asman jisimlerine gözegçilik edipdirler. Gadymy Ürgenç galasynda hem bir obserwatoriýa bolup, onda dünýä belli alymlar asman jisimlerine gözegçilik edipdirler. Asly sarahsly Ahmet as-Sarahsy matematika, astronomiýa, filosofiýa degişli işleriň ençemesini ýazypdyr. Beýik Ýüpek ýolunyň ugrundaky iň meşhur şäherleriň biri bolan Merwde doglan, belli türkmen matematigi al-Habaş al-Hasib gün sagady bilen meşgullanypdyr. Ol gün sagadynyň kömegi bilen ilkinji bolup tangens we kotangensleriň tablisalaryny düzýär. Matematikler uzak wagtlap olaryň tablisalaryndan peýdalanypdyrlar. Omar Haýýam 1074-1075-nji ýyllarda Merwdäki Mälik şanyň obserwatoriýasynda işläpdir. Şeýle hem obserwatoriýa barada gyzykly maglumatlary talyp ýaşlara giňişleýin gürrüň berdiler. Gürrüňdeşligiň ahyrynda ýaşlara okamaga, öwrenmäge, döredijilik bilen meşgullanmaga giň mümkinçilikleri döredip berýän Gahryman Arkadagymyzyň we Arkadagly Gahryman Serdarymyzyň janlarynyň sag, ömürleriniň uzak bolmagyny, döwlet ähmiýetli alyp barýan işleri elmydama rowaçlyklara beslenmegini tüýs ýürekden arzuw etdiler.

KITAP BILIMIŇ ÇEŞMESI

Kitaphanalar

28.11.2025

Döwletmämmet Azady adyndaky Arkadag şäher kitaphanasy hem-de Arkadag teleýaýlymy bilen bilelikde gurnamagynda “Kitap bilimiň çeşmesi” atly gürrüňdeşlik geçirildi. Gürrüňdeşlikde Türkmen halky kitaba, ylym-bilime uly sarpa goýýar. Şonuň üçin hem halkymyzda kitap okamak, bilim öwrenmek asylly ýörelge hökmünde ýöredilip gelinýär. Biz muny köpsanly golýazma çeşmelerinden hem, akyldarlarymyzyň edebi mirasyndan hem aýdyň görýäris. Bu bolsa kitap we kitap okamagyň nesil terbiýesinde hem uly ornunyň bardygyny subut edýär. Mirasymyzda golýazma çeşmeleriniň, gadymy kitaplaryň bardygy aýratyn bellenmäge mynasypdyr, çünki bu gymmatlyklar şu toprakda ylymyň ösdürilendigini beýan edýär. Türkmen halkynyň owal ahyrda iň ezizlän ruhy gymmatlyklarynyň biri kitap bolupdyr. Onuň täsiri dogrusynda-da aýdylýan tymsallar sanardan juda kän, sebäbi kitap dünýädäki iň uly ähmiýetli hazynany–söz baýlygyny özünde jemleýär. Adamzat durmuşynyň beýanyny, taryhyny, şu günüň habaryny, geljegiň umytlaryny we maksatlaryny kitap gatlaryndan tapyp bilýäris. Gürrüňdeşligiň ahyrynda biz ýaşlara bagtyýar durmuşda işlemäge, döretmäge, ýaşamaga ähli mümkinçilikleri döredip berýän Gahryman Arkadagymyza, Arkadagly Gahryman Serdarymyza jan saglyk, uzak ömür arzuw etdiler.

BITARAPLYK ÝOLY–DÜNÝÄ NUSGALYK ÝÖRELGÄMIZ

Kitaphanalar

27.11.2025

Döwletmämmet Azady adyndaky Arkadag şäher kitaphanasynda Arkadag teleýaýlymy hem-de Türkmenistanyň Magtymguly adyndaky Ýaşlar guramasynyň Ahal welaýat Geňeşligi bilen “Bitaraplyk ýoly–dünýä nusgalyk ýörelgämiz” atly söhbetdeşlik geçirildi. Söhbetdeşlikde ýurdumyzda hemişelik Bitaraplygymyzyň ýubileý toýunyň toýlanjak ýylynda dünýäde hyzmatdaşlygy hem-de özara düşünişmegi pugtalandyrmak bilen bagly möhüm wezipeler kesgitlenilýär. Ýurdumyz halkara bileleşigiň jogapkärli agzasy hökmünde Bitaraplyk hukuk ýagdaýyna daýanyp, “Ösüş arkaly parahatçylyk”, “Dialog– parahatçylygyň kepili” diýen döwletli ýörel¬geler esasynda halkara gatnaşyklaryň ösüşine mynasyp goşant goşýar. Hemişelik Bitaraplygymyz sebitde parahatçylygy, durnuklylygy üpjün etmekdäki geljegi uly bolan uzakmöhletleýin maksatnamalaryň rowaçlyklara beslenmeginde netijeli gurala öwrüldi. Ýurdumyz BMG bilen köp ugry öz içine alýan hyzmatdaşlyk gatnaşyklarynyň gerimini yzygiderli giňeldýänligi barada giňişleýin söhbet etdiler. Bu günki gün halkymyz hemişelik Bitaraplygymyzyň beren baky bagtyna guwanyp, bagtyýarlygyň, asudalygyň, eşretiň goýnunda ýaşaýar. Şeýle bagtyýarlygyň goýnunda ýaşadýan, adamzat ykbalynyň ýagty geljegi üçin beýik tutumlara badalga berýän Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak bolsun, beýik başlangyçlary hemişe rowaç alsyn!

BITARAPDYR WATANYM EZIZ TÜRKMENISTANYM

Kitaphanalar

27.11.2025

Aşgabat şäher medeniýet müdirliginiň Merkezleşdirilen kitaphanalar ulgamynyň gurnamagynda “Daşkent” dynç alyş seýilgähinde Hemişelik Bitaraplygyň 30 ýyllygy mynasybetli “Bitarapdyr Watanym eziz Türkmenistanym” ady bilen söhbetdeşlik geçirildi. Çykyş edenler Bitaraplyk syýasaty, Türkmenistanyň ähli döwletler bilen deňhukukly, özara hormat goýmak we içerki işlerine goşulmazlyk ýörelgelerine esaslanýan gatnaşyklary ýola goýmagyna mümkinçilik berýändigini, bu ýörelgeler halkara gatnaşyklarynda durnuklylygy we ynanyşmagy pugtalandyrmaga ýardam edýändigi hakynda giňişleýin söhbet etdiler. Şeýle-de Gahryman Arkadagymyzyň türkmen halkyna peşgeş beren “Türkmenistan Bitaraplygyň mekany” atly ajaýyp eseriniň many-mazmuny barada gürrüň etdiler. Çäräniň ahyrynda ýurdumyzyň asudalygy, agzybirligi, parahatçylygy ugrunda taýsyz tagallalary edýän Gahryman Arkadagymyza, Arkadagly Gahryman Serdarymyza alkyş sözlerini aýtdylar.

HALYPALARYŇ GÖRELDESI–ŞÄGIRTLERE ÝÖRELGE

Kitaphanalar

27.11.2025

Türkmenistanyň Bazar Amanow adyndaky döwlet çagalar ýaňy -ýakynda Aşgabat şäherindäki 51-nji orta mekdepde “Halypalaryň göreldesi – şägirtlere ýörelge” atly edebi-sazly duşuşyk geçirdi. Edebi-sazly duşuşygyň başynda mekdebiň 12-nji synp okuwçylary gün-günden gülläp ösýän ýurdumyzda Hormatly Gahryman Arkadagymyzyň, Arkadagly Gahryman Serdarymyzyň biziň ýaş nesillerimiziň döwrebap bilim almaklary üçin edýän çäksiz aladalaryna minnetdarlygyny bildirip Watanymyzy wasp edýän aýdym aýtdylar. 51-nji mekdebiň Türkmen dili we edebiýat dersinden okadýan halypa mugallym Ogulnabat Owlakowanyň yhlasly zähmetiniň netijesinde okadýan synplarynyň ähli okuwçylary uly höwes bilen sapaga gatnaşýarlar. Halypa mugallym edebiýat sapagynda klassyk şahyrlarymyzdan başlap 20 asyryň ähli ýazyjy, şahyrlarynyň eserlerini okuwçylara gyzykly, täsirli edip gürrüň berýär. Ýaş dörediji okuwçylaryň uly gyzyklanmasy, olaryň edebiýata bolan höwesi üçin mugallym döwrümiziň ýaş şahyrlary Gurbanjemal Annakowany, Kerimberdi Hakberdiýewi edebi ertirlige çagyrdy. Ýaş şahyrlar okuwçylaryň gyzyklanýan soraglaryna jogap berdiler şeýle hem olar öz gezeginde ilkinji bilim - terbiýäniň mekdep partasyndan başlanýandygyny, şu günki ýaş nesilleriň geljekde her biriniň öz isleýän kärinde ýagny, mugallym, gurluşykçy, lukman ýa-da sungat adamlary bolup ýetişmeginde hormatly mugallymlara biziň ussadymyz diýesim gelýär diýip, goşgy setirleriniň üsti bilen beýan edýär. Mekdebiň göreldeli, zehinli okuwçylary Magtymguly pyragynyň “Türkmeniň” atly goşgusyny diňe bir türkmen dilinde däl, eýsem, Ispan, Iňlis, Arap hem Rus dillerinde aýdyp berdiler. Edebi-sazly ertirligiň dowamynda Türkmen Medeniýet institutynyň talyplary hem Magtymguly atamyzyň edep-terbiýe häsiýetli goşgularyna birnäçe aýdymlar bilen çykyş etdiler. Şeýle-de mekdep müdiri Ogulbeg Annaýewa körpe nesillerimiziň kitaba bolan söýgüsini döretmekde alyp barýan wagyz-nesihat işleri, okuwçylaryň arasynda ýygy-ýygydan halypalar bilen duşuşyklar gurap geçirýän çäreleri üçin B. Amanow adyndaky döwlet çagalar kitaphanasynyň hünärmenlerine hem ýaş şahyrlarymyza öz minnetdarlygyny bildirdi. Adat bolşy ýaly geçirilen çärede kitaphananyň hünärmenleri ýazyjy-şahyrlaryň kitaplaryndan kitap sergisini gurnady. Edebi sazly duşuşygyň ahyrynda biziň ýaş nesillerimiziň bilimli we kämil ýaşlar bolup kemala gelmekleri üçin atalyk aladalary edýän türkmen halkynyň Milli Lideri Gahryman Alym Arkadagymyza, hormatly Prezidentimiz Arkadagly Gahryman Serdarymyza alkyş sözleri beýan edildi.

• ←
• 1
• ...
• 113
• 114
• 115
• ...
• 204
• →