HABARLAR

Kategoriýalar
• Medeniýet habarlary we täzelikleri
• Täzelikler
• Konsertler
• Teatr we kino dünýäsi
• Muzeýler
• Kitaphanalar
• Taryhy ýadygärlikler
• Medeni miras
• Edebiýat älemi
• Halkara gatnaşyklary

TÜRKMEN HALKYNYŇ MILLI LIDERI, TÜRKMENISTANYŇ HALK MASLAHATYNYŇ BAŞLYGY GAHRYMAN ARKADAGYMYZYŇ BALKAN WELAÝATYNA IŞ SAPARY

Täzelikler

25.11.2025

24-nji noýabrda Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow dekabr aýynda ýurdumyzyň hemişelik Bitaraplygynyň 30 ýyllygyna bagyşlanyp “Awaza” milli syýahatçylyk zolagynda geçiriljek “Häzirki zaman jemgyýetinde zenanlaryň orny: durnukly ösüşiň bähbidine halkara hyzmatdaşlygy ösdürmek” atly halkara maslahata görülýän taýýarlyk işleriniň ýagdaýy bilen tanyşmak üçin Balkan welaýatyna iş saparyny amala aşyrdy. Gahryman Arkadagymyz bu ýerde 2025-nji ýylyň“Halkara parahatçylyk we ynanyşmak ýyly” diýlip yglan edilmegi we Türkmenistanyň hemişelik Bitaraplygynyň 30 ýyllygy mynasybetli çäreleri ýokary derejede geçirmek boýunça hormatly Prezidentimiziň Permanyna laýyklykda döredilen, türkmen halkynyň Milli Lideri tarapyndan ýolbaşçylyk edilýän guramaçylyk döwlet toparynyň nobatdaky iş maslahatyny geçirdi. Gahryman Arkadagymyz, ilki bilen, Hazaryň ajaýyp kenarynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň şahamçasynyň döredilmegi teklip edilýän ýere geldi. Milli Liderimiziň başlangyjy bilen döredilen “Awaza” milli syýahatçylyk zolagy hormatly Prezidentimiziň tagallalary bilen dünýä derejeli syýahatçylyk we dynç alyş şertlerini özünde jemleýän zolaga öwrüldi. Awaza iri forumlaryň, halkara çäreleriň geçirilýän ýeri hökmünde giňden ykrar edilýär. Gaznanyň şahamçasynyň ýerleşmegi teklip edilýän binany oňlap, Gahryman Arkadagymyz bu ýerde döredilen şertler we şahamçanyň netijeli işini ýola goýmakda möhüm ähmiýeti bolan mümkinçilikler bilen içgin tanyşdy. Bu ýerde öňde durýan wezipeleri kesgitlemek, täze başlangyçlary öňe sürmek boýunça iş alyp barjak hünärmenleriň netijeli işlemekleri üçin ähli amatlyklar döredilipdir. Halk Maslahatynyň Başlygy Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň wise-prezidentleri R.Bazarowa we O.Atabaýewa ýüzlenip, halkara maslahatyň öňüsyrasynda gaznanyň şahamçasynyň açylyş dabarasyny ýokary derejede geçirmek babatda maslahatlaryny berdi. Munuň özi Halkara parahatçylyk we ynanyşmak ýylynyň taryhy ähmiýetli wakalarynyň üstüni ýetirer hem-de gaznanyň işini köptaraply esasda alyp barmaga mümkinçilik döreder. Şunda bu işleriň halkymyzyň asyrlaryň dowamynda döreden ynsanperwer ýörelgeleriniň döwrüň ruhuna kybap derejede ösdürilmeginde ähmiýetlidigine üns çekildi. Häzirki döwürde haýyr-sahawat gaznasy diňe bir ýurdumyzda däl, eýsem, halkara giňişlikde-de ynsanperwer ýörelgeleri esasy ugur edinýän düzüme öwrüldi. Munuň özi ýaş nesilleriň sagdyn ösüşi bilen baglanyşykly meseleleriň oňyn çözülmegine döwlet derejesinde ähmiýet berilýändiginiň aýdyň nyşanydyr. Soňky ýyllarda gaznanyň serişdeleriniň hasabyna bejergi alan çagalaryň saglygy dikeldildi. Munuň özi ýurdumyzda adamlaryň, aýratyn-da, ösüp gelýän ýaş nesilleriň saglygy baradaky aladanyň hormatly Prezidentimiziň durmuş ugurly syýasatynyň ileri tutulýan ugurlarynyň biri bolmagynda galýandygyny görkezýär. Şunuň bilen baglylykda, Watanymyzyň geljegi bolan ýaş nesilleriň sagdyn durmuş ýörelgelerine höwesli bolmaklary ugrunda zerur tagallalar edilýär. Şunda olaryň saglygyny bejermek işiniň bedenterbiýe we sport bilen utgaşdyrylmagyna zerur üns berilýär. _______________________ «Türkmenistan» gazeti

TÜRKMENISTAN-GAZAGYSTAN: DOSTLUK WE KÖPUGURLY STRATEGIK HYZMATDAŞLYK PUGTALANDYRYLÝAR

Täzelikler

25.11.2025

HORMATLY PREZIDENTIMIZ SERDAR BERDIMUHAMEDOWYŇ GAZAGYSTAN RESPUBLIKASYNA DÖWLET SAPARY BAŞLANDY 24-nji noýabrda hormatly Prezidentimiz Serdar Berdimuhamedow döwlet sapary bilen Gazagystan Respublikasyna ugrady. Döwlet Baştutanymyzy paýtagtymyzyň Halkara howa menzilinde ýurdumyzyň resmi adamlary ugratdylar. Türkmenistan bilen Gazagystanyň arasyndaky taryhyň, medeniýetiň, diliň, ruhy-ahlak gymmatlyklarynyň umumylygyna esaslanýan gatnaşyklar strategik hyzmatdaşlyk häsiýeti bilen tapawutlanýar. Dünýäniň energetika bazarynda möhüm orny eýeleýän iki ýurt syýasy dialogy pugtalandyrmaga, ykdysady hyzmatdaşlygy ösdürmäge, sebit howpsuzlygyny üpjün etmäge aýratyn üns berýär. 1992-nji ýylda ýurtlarymyzyň arasynda diplomatik gatnaşyklar ýola goýlan wagtyndan bäri köp sanly ylalaşyklary öz içine alýan berk şertnama-hukuk binýady kemala getirildi. Strategik hyzmatdaşlyk hakynda Şertnama özara gatnaşyklaryň ýokary derejesini tassyklaýan esasy resminama bolup durýar. Iki ýurduň döwlet Baştutanlary ikitaraplaýyn görnüşde, şeýle hem sebit we halkara guramalaryň çäklerinde yzygiderli dialogy saklaýarlar. Ýurtlarymyz halkara guramalaryň, ilkinji nobatda, BMG-niň çäklerinde hereketlerini utgaşdyryp, birek-biregiň parahatçylygy, howpsuzlygy, durnukly ösüşi üpjün etmäge gönükdirilen başlangyçlaryny goldap çykyş edýärler. Gazagystan Türkmenistanyň halkara derejede ykrar edilen hemişelik Bitaraplyk derejesini üýtgewsiz goldap, oňa sebitde durnuklylygyň möhüm şerti hökmünde garaýar. Öz gezeginde, Türkmenistan hem Gazagystanyň netijeli başlangyçlaryny yzygiderli goldaýar. Söwda-ykdysady hyzmatdaşlyk türkmen-gazak gatnaşyklarynyň esasy ugurlarynyň biridir. Ýurtlarymyz özara haryt dolanyşygynyň möçberini has-da artdyrmagy maksat edinýärler. Uglewodorod serişdelerini iri eksport ediji Türkmenistan hem-de Gazagystan nebitgaz ulgamynda işjeň hyzmatdaşlyk edýärler. Iki ýurduň bazarlaryny baglanyşdyrýan we ählumumy energetika ugurlaryna çykýan turba geçiriji infrastrukturasy bu hyzmatdaşlykda wajyp orny eýeleýär. Gadymy Beýik Ýüpek ýolunyň ugrunda ýerleşýän Türkmenistan hem-de Gazagystan Ýewropanyň, Merkezi Aziýanyň ýurtlaryny Pars aýlagy we Hind ummany bilen baglanyşdyrýan Demirgazyk—Günorta ulag geçelgesini ösdürmek boýunça işjeň tagalla edýärler. Bu ulag geçelgesiniň düzümine girýän Gazagystan—Türkmenistan—Eýran demir ýoly iki ýurduň hem-de tutuş sebitiň üstaşyr geçirijilik kuwwatyny artdyrmaga ýardam berýän taslamadyr. Ýurtlarymyz kenarýaka döwletler hökmünde Hazar deňziniň biodürlüligini goramak meseleleri boýunça hyzmatdaşlyk edýärler. 2018-nji ýylda Aktau şäherinde gol çekilen Hazar deňziniň hukuk derejesi hakynda Konwensiýa bu hyzmatdaşlygy ösdürmekde möhüm tapgyr boldy. Türkmen hem-de gazak halklarynyň arasyndaky medeni-ynsanperwer gatnaşyklar döwletara hyzmatdaşlygyň berk binýadyny emele getirýär. Milli sungaty, däp-dessurlary wagyz etmäge gönükdirilen özara Medeniýet günleriniň, bilelikdäki maslahatlaryň we beýleki çäreleriň yzygiderli geçirilmegi, akademiki, ylmy alyşmalar munuň şeýledigini aýdyň tassyklaýar. _____________ «Türkmenistan» gazeti

«YNSAN ÖMRÜNIŇ GORAGYNDA» ATLY WAGYZ-NESIHAT DUŞUŞYGY GEÇIRILDI

Täzelikler

24.11.2025

Türkmenistanyň Döwlet çeperçilik akademiýasynda mugallymlaryň hem-de talyplaryň gatnaşmagynda «Ynsan ömrüniň goragynda» atly wagyz-nesihat duşuşygy geçirildi. Duşuşykda adamlaryň saglygynyň we abadan durmuşynyň döwlet syýasatynyň ileri tutulýan ugry hökmünde kesgit¬lenilýän ýurdumyzda Gahryman Arkadagymyzyň başyny başlan asylly işleri hormatly Prezidentimiziň ta¬gallalary esasynda has-da rowaçlanyp, ýetilen beýik sepgitler dogrusynda yzygiderli çykyşlar ýerine ýetirildi. Şeýle-de, ynsan saglygyna bagyşlanan sagdyn-durmuş ýörelgelerini ündeýän çykyşlar beýan edildi.

ÇAGALARYŇ KÖŇÜLLERINDE ORUN ALAN ŞAHYR

Kitaphanalar

24.11.2025

Mähriban okyjylar ýaňy-ýakynda Türkmenistanyň Bazar Amanow adyndaky döwlet çagalar kitaphanasy Aşgabat şäherindäki 51-nji orta mekdepde “Çagalaryň köňüllerinde orun alan şahyr” atly ýazyjy, şahyr, dramaturg Hemra Şirowyň doglan gününiň 75 ýyllygy mynasybetli edebi duşuşyk geçirdi. Hemmämiziň bilşimiz ýaly, biz mekdep partasynda oturyp, hat ýazmagy öwrenip, kitaplary okap başlaýarys. Munuň üçin biz ilkinji galam tutmagy öwreden mugallymymyza minnetdarlygymyzyň çägi ýok. Kitap okamagy öwreninemizden soň gyzykly ertekileri, goşgulary okap bilýäris. Elbetde körpe okyjylara tebigatyň täsinligini, haýwanlar hakynda gyzykly wakalary, çagalyk dünýäsiniň durmuşyny beýan edýän goşgulary ýazyp sowgat berýän biziň şahyrlarymyz, ýazyjylarymyz. Ine şol gyzykly goşgularyň awtorynyň biri çagalary söýýän şahyr Türkmenistanyň Prezidentiniň “Türkmeniň Altyn asyry” bäsleşiginiň ýeňijisi, Magtymguly Pyragynyň 300 ýyllygyna atly ýubileý medalyň eýesi bolan tanymal türkmen ýazyjysy, dramaturg, şahyr, Hemra Şirow. Halypa Hemra Şirow ýaş okyjylar bilen ýygy-ýygydan duşuşyklarda bolýar. Ol hemişe çagalaryň ýürekden küýseýän myhmany. Ýazyjy indi ömrüniň 40 ýyldan gowrak wagtyny çagalar bilen döredijilik duşuşyklaryna uly höwes bilen gatnaşyp gelýär. Çagalaryň şahyra sabyrsyzlyk bilen garaşýandyklary tötänden däldir, çünki ýazyjynyň eserleriniň köpüsi çagalara bagyşlanýar. Şahyr Hemra Şirowyň Türkmen döwlet gurjak teatrynda 2009-njy ýylda “Ýartygulak” 2010-njy ýylda “Alýaňak”, 2013-nji ýylda “Öweý eje” atly eserlerini režisýor Ylýas Durdyýew sahnalaşdyryp halk köpçüligine ýetirildi. Şahyryň goşgularynda goşa mazmunly–hem çagalara, şonuň bilen birlikde-de, ulular üçinem ýazylan goşgular az däl. Edebi gözleglere baý döredijiligi bilen okyjylaryň söýgüsini gazanan halypa Hemra Şirow elmydama edebiýat meýdanynyň tämizligi ugrunda barlyşyksyz göreşýän ýazyjy. Çagalaryň şahyra sabyrsyzlyk bilen garaşýandyklary tötänden däldir, çünki ýazyjynyň eserleriniň köpüsi çagalara, bagyşlanýar. Çagalyk–bu biziň her birimiziň gelip çykan mekanymyzdyr. Bu ýurt nä derejede ýagty we mährem bolsa, şonda ulaljak çagalar hem şonça mähirli we gowy adamlar bolup ýetişerler. Şahyr çaganyň aň-bilime bolan höwesini oýarjak, tebigaty söýmeklige we töweregindäki adamlara düşünmeklige eltjek ýagşylyga çagyrýan çagalar üçin kitaplarydygyny aýdýar. Halypa şahyryň gelmegine çäksiz begenen 51-nji orta mekdebiň 4-nji “B”, “Ç” synpyň göreldeli okuwçylary Hemra Şirowyň goşgular ýygyndysyndan “Ýyrtylan kitap”, “Ýalta oglanjygyň arzuwy” atly goşgularyny sahnalaşdyryp ýerine ýetirdiler. Şahyr okuwçylar bilen geçirilýän duşuşykda olaryň aň-düşünjesini barlamak üçin düzen matematika dersi boýunça tapmaça goşgulary, edebi dilde arassa ýalňyşsyz gürläp bilmegi üçin edebiýat sapagy bilen bagly ýaňlytmaç görnüşli goşgulary okap çaglar bilen sorag-jogap alyşýar. Çagalar öz gezeginde begenip şowhun bilen tapmaça goşgularyň jogaplaryny berýärler. Halypa şahyr kitaplary köpräk okamagy, diňe kitap bilen dostlaşsaň köp zady öwrenip boljakdygyny wagtyňy bisarpa tutmazlygy okuwçylara tabşyrýar. Geçirilen çärede kitaphananyň hünärmenleri şahyryň birnäçe tomdan ybarat bolan tomluk kitaplary we irki döwürlerde çap edilen kitaplardan kitap sergisini gurnady. Söhbetdeşligiň ahyrynda gün-günden gülleýän, bagtly çagalaryň iň arzyly arzuwlarynyň hasyl bolýan ýurduna öwürýän Gahryman Arkadagymyza we Arkadagly Gahryman Serdarymyza alkyş sözleri aýdyldy.

«HALK SAZ GURALLARY» KAFEDRASYNYŇ ÝAŞ MUGALLYMY RAHYMBERDI HOJAGELDIÝEWIŇ TALYPLARYNYŇ KONSERTI

Konsertler

24.11.2025

Berkarar döwletiň täze eýýamynyň galkynyşy döwründe türkmen halkynyň Milli Lideri Gahryman Arkadagymyzyň we peder ýoluny mynasyp dowam etdirýän Arkadagly Gahryman Serdarymyzyň türkmen medeniýetini we sungatyny ösdürmekde edýän atalyk aladalary çäksizdir. Ýakynda, “Halkara parahatçylyk we ynanyşmak ýyly” mynasybetli Maýa Kulyýewa adyndaky Türkmen milli konserwatoriýasynda “Halk saz gurallary” kafedrasynyň ýaş mugallymy Rahymberdi Hojageldiýewiň talyplarynyň konserti geçirildi. Konsertiň başynda Çarlz Manýanteniň “Wenesiýa karnawaly” eserini V ýyl talyby Aşyr Sadulaýew ýerine ýetirdi we tomaşaçylaryň elçarpyşmalaryna mynasyp boldy. Soňra II ýyl talyby Amangeldi Baýramgeldiýew meşhur daşary ýurt kompozitory Astor Piazzollanyň “Libertango” eseri bilen çykyş etdi. Onuň yzysüre II ýyl talyby Didar Jumadurdyýew kompozitor Konstantin Mýaskowyň dost-doganlyk sazy bolan “Özbek tansy” eserini örän täsirli ýerine ýetirdi. Ussat kompozitor Waleriý Kowtunuň “Fantaziýa” uly göwrümli eserini hem-de “Kubinskiý karnawal” eserleri bilen IV ýyl talyby Jangeldi Hümmedow çykyş etdi. Bu çykyşlar tomaşaçylarda ýakymly ýatlamalar galdyrdy. Meşhur türkmen kompozitory Baýramdurdy Hudaýnazarowyň “Tokkata” eserini V ýyl talyby Rüstem Haýytow ýerine ýetirdi. Bu çykyş tomaşaçylar üçin täsirli çykyş boldy we gyzgyn elçarpyşmalara mynasyp boldy. Konserti II ýyl talyby Ylham Şerdalyýew ussat daşary ýurt kompozitorlary Wiktor Wlasowyň “Bossa-nowa”, Astor Piazzollanyň we Wladimir Zykiniň belli eseri “Libertango” eserleri bilen jemledi. Bu eserler tomaşaçylarda örän täsirli ýatlamalary galdyrdy. “Halkara parahatçylyk we ynanyşmak ýyly” mynasybetli “Halk saz gurallary” kafedrasynyň ýaş mugallymy Rahymberdi Hojageldiýewiň talyplarynyň konserti örän gyzykly we täsirli geçirildi. Konsert tamamlanandan soňra konsertde çykyş eden talyplar we tomaşaçylar ýadygärlik surata düşdiler. Türkmen Halkynyň milli Lideri Gahryman Arkadagymyza we peder ýoluny mynasyp dowam etdirýän Arkadagly Gahryman Serdarymyza biz ýaşlaryň kämil derejede ylymly-bilimli bolmagy, öz zehinimizi açyp görkezmäge uly mümkinçilikleri döredip berýänligi üçin edýän atalyk aladalary üçin sagbolsunymyzy aýdýarys. _____________ Osman Sapargeldiýew Maýa Kulyýewa adyndaky Türkmen milli konserwatoriýasynyň “Halk sazy” fakultetiniň V ýyl talyby

DÜNÝÄ MEDENIÝETINIŇ ÝAŇY TÜRKMENISTANDA: ÝEWROPA BILELEŞIGINIŇ TÜRKMENISTANDAKY KONSERTI

Konsertler

24.11.2025

Ýewropa Bileleşigi bilen Türkmenistanyň arasynda alnyp barylýan hoşniýetli hyzmatdaşlygyň ösdürilmegi ugrunda edilýän işler çuňňur hoşallyga mynasypdyr. Bu hyzmatdaşlygyň möhüm bölegi hökmünde Türkmenistanda Ýewropa Bileleşiginiň Medeniýet günleriniň geçirilmegi örän uly ähmiýete eýedir. Soňky ýyllarda bu çäre ýurdumyzda asylly däbe öwrüldi, gatnaşyjylar Ýewropa Bileleşigi bilen özara deňhukukly hyzmatdaşlygy yzygiderli ösdürmegiň ähmiýetini nygtap, Türkmenistanyň hemişelik Bitaraplyk hukuk derejesine ygrarlydygyny we bu ýörelgäniň daşary syýasatynda aýratyn orun eýeleýändigini belleýärler. Türkmenistanyň Prezidentiniň we Türkmen halkynyň Milli Lideriniň ýolbaşçylygynda ýurtda durnukly ösüşiň esasyny hökmünde medeniýetiň, bilimiň we ylmyň ähmiýetini berkidýän ynsanperwer ýörelgeler rowaçlanýar. Soňky ýyllarda Türkmenistan bilen Ýewropa Bileleşiginiň arasyndaky hyzmatdaşlyklar has-da giň gerime eýe boldy. Ýewropa Bileleşiginiň ýurtlary hem syýasy-diplomatik, söwda-ykdysady, medeni-ynsanperwer ulgamlarda gatnaşyklary berkitmäge uly ähmiýet berýärler. Şeýle hem bu gurama bilen dürli taslamalar we bilelikdäki maksatnamalar ençeme üstünlikli amala aşyrylýar. Ýewropa Bileleşiginiň Türkmenistandaky Medeniýet günleri, özara gatnaşyklaryň täze mümkinçiliklerini açyp berýär. Bu çäreleriň çäklerinde geçirilýän duşuşyklar, konsertler, ykdysady sapaklar, Ýewropanyň milli festiwallary we beýleki köp sanly çäreler iki tarap üçin hem täsirli bolýar. Türkmenistanyň medeniýet işgärleri Ýewropa Bileleşiginiň “Gerasimus” maksatnamasynyň çäklerinde geçirilýän okuwlaryň we iş duşuşyklaryna işjeň gatnaşyp, özleriniň hünär derejesini ýokarlandyrýarlar. Ýewropa Bileleşiginiň Türkmenistandaky Medeniýet günleriniň dabaraly açylyşy mynasybetli geçirilen konsert hem bu hyzmatdaşlygyň aýdyň mysaly boldy. Mukamlar köşgünde guralan bu ajaýyp saz agşamynda Polşaly meşhur pianinoçy Woýseh Waleçek, saz äleminiň dürli döwürleriniň kompozitorlarynyň eserlerini ýaňlandyrdy. Konserte dürli ýaşdaky tomaşaçylar höwesjeň gatnaşyp, ussat ýerine ýetirijiniň dünýä belli saz eserleriniň kalplara siňen täsirinden lezzet aldylar. Dabaraly konsertiň dowamynda W.A.Mozartyň 40-njy simfoniýasy, L.Wan Bethoweniň 5-nji simfoniýasy, F.Listiň “Söýgi düýşleri”, F.Şopeniň fortepiano üçin 1-nji konserti, N.Paganiniň №24 “Kapriz” ýaly nusgawy eserler bilen birlikde, K.Debýussiniň “Aý şöhlesi” we Isaak Albenisiň “Tango” ýaly impressionist döwrüniň eserleri hem ýaňlandyryldy. Konsertiň dowamynda dirižýor Rasul Klyçýewiň ýolbaşçylygyndaky Türkmen Döwlet simfoniki orkestri hem Woýseh Waleçek bilen bilelikde konsert eserlerini ýerine ýetirdiler. Ýerine ýetiriji ussat sazandalar tomaşaçylara dürli döwürleriň ajaýyp saz keşplerini ýaňlandyrdylar we gyzgalaňly el çarpyşmalar bilen garşy alyndylar. Ajaýyp saz agşamynyň soňunda meýilnamadan daşary Woýseh Waleçek ruhy buýsançly joşguny bilen Beýik Polýak kompozitory F.Şopeniň saz eserini ussatlyk bilen ýerine ýetirip, tomaşaçylaryň kalbyna siňdi. Bu konsert, Ýewropa we Türkmen medeniýetleriniň sazlaşygynyň ajaýyp beýany bolup, gatnaşyjylaryň ýüreklerinde ýatdan çykmajak täsir galdyrdy. Bu ýaly çäreler, iki halkyň medeniýetleriniň has-da ýakynlaşmagyna, özara düşünişmegine we hyzmatdaşlygyň täze sepgitlere ýetmegine uly goşant goşýar. Ýewropa Bileleşiginiň Medeniýet günleri, diňe bir sungat çäresi bolman, eýsem syýasy, ykdysady we ynsanperwer gatnaşyklaryň has-da pugtalanmagyna ýardam berýän möhüm ähmiýetli forumdyr. Bu günleriň dowamynda geçirilýän dürli duşuşyklar we gepleşikler, geljekde amala aşyryljak bilelikdäki taslamalar üçin täze mümkinçilikleri döredýär. Türkmenistanyň hemişelik Bitaraplygy syýasatynyň çäklerinde Ýewropa Bileleşigi bilen alnyp barylýan netijeli hyzmatdaşlyk, sebitde we dünýäde parahatçylygyň, durnuklylygyň pugtalanmagyna hem öz goşandyny goşýar. Bu ugurda edilýän tagallalar, geljekde hem dowam etjekdigine we has-da rowaçlanjakdygyna ynanýarys. Türkmenistan bilen Ýewropa Bileleşiginiň arasyndaky halkara hyzmatdaşlygyň ösdürilmegi ugrunda giň gerimli işleri alyp barýan Türkmen halkynyň Milli Lideri Gahryman Arkadagymyza we Hormatly Prezidentimize tüýs ýürekden alkyş aýdýarys. ______________ Ahmet Jumakulyýew Maýa Kulyýewa adyndaky Türkmen milli konserwatoriýasynyň «Sazşynaslyk» hünäriniň 3-nji

KITAPHANA EKSKURSIÝA BARÝARYS...

Kitaphanalar

24.11.2025

Türkmenistanyň Bazar Amanow adyndaky Döwlet çagalar kitaphanasyna ýakynda A.S.Puşkin adyndaky bilelikdäki türkmen-rus orta umumy bilim berýän mekdebiniň okuwçylary ekskursiýa geldiler. Olary kitaphana hünärmenleri mähirli garşylap kitaphanamyzda hereket edýän bölümler, hem-de olarda alynyp barylýan işler barada gürrüň berdiler. Esasanda “Uly ýaşly okyjylara hyzmat ediş” bölüminiň kitap tekjelerindäki özleriniň ýaş aýratynlyklaryna görä bar bolan kitaplaryň many-mazmuny barada uly gyzyklanma bilen tanyşdylar. Kitaphanada özüňi alyp barmaklygyň kadalary hem-de kitaphanamyzyň hyzmatyndan peýdalanmaklygyň düzgünleri bilen hem ýaşajyk kitapsöýüjilere maglumat berildi. Kitaphanamyzyň diwarlyklaryndaky hemişelik hem-de wagtlaýyn kitap sergileriniň ähmiýeti dogrusyndaky berilen gürrüňler hem okuwçylarda uly täsir galdyrdy. Ekskursiýa gelmek bilen kitaphanamyzyň okyjylarynyň sanynyň artmagyna ýardam beren bu günki ýaşajyk okyjylarymyz hem-de olaryň mugallymlary kitaphana hyzmatyndan hem-de ýurdumyzda durmuşa geçirilýän kitap we kitaphana işiniň özleriniň bilim almaklarynda ähmiýetiniň ulydygyny bellediler. Häzirki ajaýyp döwrümizde bilim almaklyga, öwrenmeklige döredilýän giň şertler üçin ýaş nesillerimiz Gahryman Arkadagymyza we Arkadagly Gahryman Serdarymyza alkyşlary beýan etdiler.

BÜTINDÜNÝÄ ÇAGALAR GÜNI MYNASYBETLI GURALAN ÇÄRE

Täzelikler

24.11.2025

22-nji noýabrda Paýtagtymyzda Bütindünýä çagalar güni mynasybetli “Bitaraplyk we ynsanperwerlik: inklýuziw geljegiň bähbidine hemmetaraplaýyn goldaw” ady bilen çäre geçirildi. Halkara ähmiýetli çäräniň dowamynda ýurdumyzda ösüp gelýän ýaş nesiller baradaky aladanyň döwlet syýasatynyň ileri tutulýan ugurlarynyň biri hökmünde kesgitlenilmegi we bu ugurda halkara hyzmatdaşlygyň işjeňleşdirilmegi, dünýäniň ösen tejribesiniň özleşdirilmegi bilen bagly meseleler ara alnyp maslahatlaşyldy. Häzirki döwürde Gahryman Arkadagymyzyň başyny başlan ynsanperwer ýörelgeleriniň Arkadagly Gahryman Serdarymyzyň baştutanlygynda üstünlikli durmuşa geçirilmegi esasynda ýaş nesilleriň hemmetaraplaýyn bilim-terbiýeli bolmagyna döwlet derejesinde uly ähmiýet berilýär. Munuň özi Bütindünýä çagalar güni mynasybetli geçirilen çärede-de öz beýanyny tapdy. Çärä gatnaşyjylar, ilki bilen, bu ýerde ýaýbaňlandyrylan giň möçberli sergi bilen tanyşdylar. Gözden geçirilişde Türkmenistanyň Saglygy goraýyş we derman senagaty, Bilim, Zähmet we ilaty durmuş taýdan goramak ministrliklerine degişli bölümlere aýratyn orun berildi. Bu ýerde häzirki döwürde ýurdumyzda degişli ugurlarda ýetilen sepgitler, gazanylýan üstünlikler, ministrlikleriň tagallalary bilen amala aşyrylýan işler baradaky maglumatlar barada düşünje almaga mümkinçilik döredi. Soňra Bütindünýä çagalar güni mynasybetli geçirilýän çäre öz işine başlady. Bu ýerde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa söz berildi. Häzirki döwürde ýurdumyzda çagalar baradaky ählitaraplaýyn alada döwlet syýasatynyň möhüm ugurlarynyň birine öwrüldi. Şu günki çäräniň Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy bilen Birleşen Milletler Guramasynyň Çagalar gaznasynyň Türkmenistandaky wekilhanasynyň bilelikde guramagynda geçirilýändigini aýdyp, O.Atabaýewa bu iki düzümiň esasy maksadynyň çagalaryň saglygyny goramakdan, olaryň bilim almaklaryna ýardam bermekden, durmuş üpjünçiligi meseleleri boýunça degişli işleri amala aşyrmakdan ybaratdygyny nygtady. Haýyr-sahawat gaznasynyň wise-prezidenti çagalar üçin hemmetaraplaýyn goldawy öz içine alýan geljegi döretmegiň ähmiýeti barada pikir alyşmak we Bütindünýä çagalar gününi dabaralandyrmak maksady bilen ýörite çäräniň guralandygyny belledi. Ol her ýylyň noýabrynda Bütindünýä çagalar gününiň bellenilýändigini aýdyp, BMG-niň Baş Assambleýasynyň çagalaryň hukugy baradaky Jarnamany, Çagalaryň hukuklary hakynda Konwensiýany kabul etmeginiň Milletler Bileleşigi tarapyndan ösüp gelýän ýaş nesiller barada uly alada edilýändigini alamatlandyrýandygyna ünsi çekdi. O.Atabaýewa çagalaryň hemmetaraplaýyn ösüşine goldaw bermegiň ýurdumyzyň nurana geljegine mynasyp goşantdygyny aýdyp, ýaş nesillere goldaw bermegiň Howandarlyga mätäç çagalara hemaýat bermek boýunça haýyr-sahawat gaznasynyň işiniň esasy ugruna öwrülendigini, şunda Gahryman Arkadagymyzyň we hormatly Prezidentimiziň goldawlarynyň ynsanperwer ýörelgeleri ilerletmäge oňyn täsirini ýetirýändigini nygtady. _____________ «Türkmenistan» gazeti

TÜRKMEN HALKYNYŇ MILLI LIDERI, TÜRKMENISTANYŇ HALK MASLAHATYNYŇ BAŞLYGY GAHRYMAN ARKADAGYMYZ HEMIŞELIK BITARAPLYGYMYZYŇ 30 ÝYLLYK BAÝRAMYNA GÖRÜLÝÄN TAÝÝARLYK IŞLERI BILEN TANYŞDY

Täzelikler

24.11.2025

22-nji noýabrda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň ýolbaşçylygynda Halkara parahatçylyk we ynanyşmak ýyly hem-de hemişelik Bitaraplygymyzyň şanly 30 ýyllyk baýramy mynasybetli çäreleri ýokary derejede geçirmek boýunça guramaçylyk döwlet toparynyň nobatdaky mejlisi geçirildi. Şeýle-de Gahryman Arkadagymyz paýtagtymyzda halkara çäreleriň geçiriljek binalarynyň taýýarlyk derejesi bilen tanyşdy. Ýurdumyzyň durmuşynda möhüm orny eýeleýän şanly seneleriň ýokary guramaçylyk derejesinde geçirilmegine gönükdirilen meseleleri ara alyp maslahatlaşmak asylly däbe öwrüldi. Munuň özi giň möçberli halkara çäreleriň talabalaýyk guralmagynda, olaryň netijeli häsiýete eýe bolmagynda ähmiýetlidir. ...Ir bilen Milli Liderimiz paýtagtymyzyň binagärlik keşbi bilen bir bitewi sazlaşygy emele getirýän Bitaraplyk binasynyň ýanyna geldi. Säheriň hoştap howaly çaglarynda bu künjegiň gözelligi ynsan ruhuna oňyn täsir edýär. Gahryman Arkadagymyz şäheriň abadançylygyna, bezeg işlerine zerur üns berilmelidigini belläp, meýilleşdirilen halkara çärelerde ýurdumyzyň ösüşleriniň, türkmen halkynyň döwletlilik ýörelgeleriniň öz beýanyny tapmalydygyna ünsi çekdi. Türkmenistanyň Halk Maslahatynyň Başlygy bu ýerleriň bezeg aýratynlyklaryna, onda ulanylýan gurluşyk serişdeleriniň berkligine zerur üns berilmelidigini aýtdy. Şunda gök zolaklar talabalaýyk bolmalydyr we alnyp barylýan abadanlaşdyryş işleri ýokary ekologik talaplara laýyk gelmelidir. Hormatly Arkadagymyz Bitaraplyk binasynyň ýerleşýän ýeriniň mukaddes künjege öwrülendigini, bu ýere ildeşlerimiziň we şäheriň myhmanlarynyň ýygy-ýygydan gelýändiklerini kanagatlanma bilen belledi. Munuň özi halkymyzyň Garaşsyz Watanymyzyň hemişelik Bitaraplyk derejesine bolan milli buýsanjynyň aýdyň nyşanydyr. Milli Liderimiz Bitaraplygyň 30 ýyllygy mynasybetli guraljak çäreleriň medeni maksatnamasynyň talabalaýyk derejede taýýarlanylmalydygyny nygtady. Ähli çäreler ýurdumyzyň Bitaraplyk derejesine, hormatly Prezidentimiziň baştutanlygynda amala aşyrylýan parahatçylyk söýüjilikli syýasatyň ugurlaryna doly laýyk gelmelidir. Soňra Türkmenistanyň Halk Maslahatynyň Başlygy paýtagtymyzda alnyp barylýan abadanlaşdyryş işleriniň barşy bilen tanyşdy. Berkarar döwletiň täze eýýamynyň Galkynyşy döwründe Gahryman Arkadagymyzyň başyny başlan şähergurluşyk syýasatynyň hormatly Prezidentimiziň baştutanlygynda üstünlikli durmuşa geçirilmegi esasynda ak mermerli Aşgabat halkara giňişlikde gözelligiň hem-de geljegiň şäheri hökmünde ykrar edilýär. Milli binagärligiň iň gowy däplerini, häzirki zamanyň öňdebaryjy şähergurluşyk tejribelerini özünde jemleýän dürli maksatly desgalar ýokary derejedäki durmuş şertlerini üpjün etmek bilen bir hatarda, paýtagtymyzyň täze keşbini emele getirýär. Aşgabadyň çäklerinde bina edilen döwrebap desgalaryň birnäçesi dünýä binagärliginiň ajaýyp täsinligi hökmünde Ginnesiň rekordlar kitabyna girizildi. Munuň özi Diýarymyzda giň möçberli şähergurluşyk maksatnamasynyň rowaçlyklara beslenýändiginiň aýdyň beýanydyr. Ýeri gelende aýtsak, Aşgabat ak mermer örtülen binalaryň iň köp jemlenen şäheri hökmünde dünýäde ykrar edildi. ___________ «Türkmenistan» gazeti

TÜRKMENISTANYŇ MEJLISINIŇ MASLAHATY

Täzelikler

24.11.2025

22-nji noýabrda Türkmenistanyň Mejlisiniň ýedinji çagyrylyşynyň on birinji maslahatynda hormatly Prezidentimiz Serdar Berdimuhamedowyň görkezmeleri esasynda ýurdumyzyň kanunçylyk-hukuk binýadyny kämilleşdirmek boýunça giň gerimli işleriň çäklerinde işlenip taýýarlanylan birnäçe täze kanunlar we kadalaşdyryjy hukuk namalary ara alnyp maslahatlaşyldy. Oňa Ministrler Kabinetiniň Başlygynyň orunbasarlary, ministrlikleriň, pudaklaýyn dolandyryş edaralarynyň ýolbaşçylary, köpçülikleýin habar beriş serişdeleriniň wekilleri çagyryldy. Halkymyzyň bagtyýar durmuşyny, ýurdumyzyň mundan beýläk-de okgunly durmuş-ykdysady ösüşini üpjün etmäge gönükdirilen “Türkmenistanyň 2026-njy ýyl üçin Döwlet býujeti hakynda” Türkmenistanyň Kanunynyň taslamasyna, “Türkmenistanyň 2024-nji ýyl üçin Döwlet býujetiniň ýerine ýetirilişi hakynda” Türkmenistanyň Mejlisiniň kararynyň taslamasyna seretmek maslahatyň gün tertibindäki esasy mesele boldy. Çykyş edenleriň belleýişleri ýaly, esasy maliýe-hukuk resminamasy möhüm pudaklaryň durnukly ösüş depginini saklamagyň, sebitleri ösdürmegiň, umuman, Diýarymyzyň ägirt uly mümkinçiliklerini durmuşa geçirmegiň hasabyna giň gerimli özgertmeleri üstünlikli ýerine ýetirmäge, milli ykdysadyýetimiziň kuwwatyny pugtalandyrmaga gönükdirilendir. Bu kanunçylyk taslamasy taýýarlanylanda, döwlet Baştutanymyzyň we Gahryman Arkadagymyzyň gymmatly maslahatlaryndan ugur alnyp, gelip gowşan teklipler öwrenilip, ol milli parlamentiň ähli komitetlerinde deslapdan ara alnyp maslahatlaşyldy, ýurdumyzyň ministrliklerinde, pudaklaýyn dolandyryş edaralarynda giňden seljerildi. Ýurduň esasy maliýe resminamasy iri möçberli döwlet maksatnamalarynda, şol sanda «Berkarar döwletiň täze eýýamynyň Galkynyşy: Türkmenistany 2022-2052-nji ýyllarda durmuş-ykdysady taýdan ösdürmegiň Milli maksatnamasynda» bellenilen wezipeleri amala aşyrmagyň özboluşly ýyllyk ýol görkezijisi bolup çykyş edýär. Milli ykdysadyýeti diwersifikasiýalaşdyrmak boýunça Gahryman Arkadagymyz tarapyndan başy başlanyp, häzirki wagtda hormatly Prezidentimiziň baştutanlygynda üstünlikli durmuşa geçirilýän syýasata laýyklykda, Türkmenistanyň 2026-njy ýyl üçin Döwlet býujetinde ýangyç-energetika, gurluşyk-senagat, oba hojalyk toplumlary, ulag-aragatnaşyk, dokma we azyk senagaty ýaly binýatlaýyn pudaklary depginli ösdürmek göz öňünde tutulýar. Tassyklanylan durmuş-ykdysady strategiýa görä, paýtagtymyzda we ýurdumyzyň sebitlerinde iri taslamalaryň, şähergurluşyk maksatnamasynyň durmuşa geçirilişine, ulag-aragatnaşyk, önümçilik düzümleriniň täze desgalarynyň gurulmagyna, ähli ulgamlarda innowasion tehnologiýalaryň, ylymda, tehnikada soňky gazanylanlaryň giňden ornaşdyrylmagyna iri möçberli serişdeler bölünip berilýär. Arkadagly Gahryman Serdarymyzyň şu ýylyň 19-njy sentýabrynda geçirilen Türkmenistanyň Halk Maslahatynyň mejlisinde nygtaýşy ýaly, milli ykdysadyýetimiziň ýokary depginli ösüşi ýurdumyzyň býujet girdejilerini yzygiderli artdyrmaga mümkinçilik berýär. Döwlet býujeti bolsa ykdysadyýetimizi meýilleşdirmegiň möhüm guralydyr. Mälim bolşy ýaly, döwletimiziň kanun çykaryjy edarasynyň işi «Watan diňe halky bilen Watandyr! Döwlet diňe halky bilen döwletdir!» şygary arkaly beýan edilýän durmuş maksatly syýasatyň ileri tutulýan ugurlaryny nazara almak bilen, ilkinji nobatda, türkmenistanlylaryň ýaşaýyş-durmuş derejesiniň we hal-ýagdaýynyň yzygiderli ýokarlandyrylmagyny maksat edinýär. _____________ «Türkmenistan» gazeti

• ←
• 1
• ...
• 31
• 32
• 33
• ...
• 246
• →