HABARLAR

Kategoriýalar
• Medeniýet habarlary we täzelikleri
• Täzelikler
• Konsertler
• Teatr we kino dünýäsi
• Muzeýler
• Kitaphanalar
• Taryhy ýadygärlikler
• Medeni miras
• Edebiýat älemi
• Halkara gatnaşyklary

«MADDY DÄL MEDENI MIRASY ÖWRENMEGIŇ MILLI TEJRIBESI» atly döredijilik duşuşygy geçirildi

Medeni miras

23.10.2025

Türkmen halkynyň köp asyrlyk taryhynyň emele gelmeginiň täze tapgyry bolan Berkarar döwletimiziň täze eýýamynyň Galkynyşy döwri ata-babalarymyzyň baý mirasyny bütin dünýäde ýaýmak üçin giň mümkinçilikleri açýan ajaýyp döwürdir. Muňa Türkmenistan bilen Birleşen Milletler Guramasynyň arasyndaky hyzmatdaşlygyň ählitaraplaýyn ösdürilmegi hem aýdyň mysallaryň biridir. Häzirki wagtda Arkadagly Gahryman Serdarymyzyň, Hormatly Prezidentimiziň parasatly ýolbaşçylygynda BMG-niň möhüm gurluş bölümlerinden biri bolan Bilim, ylym we medeniýet meseleleri boýunça ýöriteleşdirilen edarasy (UNESCO) bilen hyzmatdaşlygyň ösdürilmegine we giňeldilmegine aýratyn ähmiýet berilýär. Türkmenistan 1993-nji ýylda ÝUNESKO-nyň doly hukukly agzasy boldy. 2003-nji ýylda ÝUNESKO «Maddy däl medeni mirasy goramak baradaky» Konwensiýany kabul etdi. 2011-nji ýylda bolsa Türkmenistan ÝUNESKO-nyň «Maddy däl medeni mirasy goramak baradaky» Konwensiýasyna goşuldy we şondan bäri onuň iň işjeň agzasy bolup durýar. Häzirki döwürde ýurdumyzda Birleşen Milletler Guramasynyň Bilim, ylym we medeniýet boýunça edarasy ÝUNESKO bilen hyzmatdaşlygyň çäginde okuw seminarlary, maslahatlar we dürli medeni çäreler yzygiderli geçirilýär. 2023-nji ýyldan bäri her ýylyň 17-nji oktýabrynda halklaryň nesilden–nesle geçip gelen baý mirasyna, däp-dessurlaryna, maddy däl medeni gymmatlyklary baradaky bilimlerine we başarnyklaryna bagyşlanan Halkara maddy däl medeni miras güni ÝUNESKO tarapyndan hem-de Konwensiýa girýän döwletler tarapyndan giňden bellenilip geçilýär. ÝUNESKO tarapyndan bellenilýän Halkara maddy däl medeni miras güni mynasybetli Türkmenistanyň Medeniýet ministrliginiň Maddy däl medeni miras müdirliginiň hem-de ÝUNESKO-nyň işleri barada Türkmenistanyň Milli toparynyň bilelikde guramagynda Türkmenistanyň döwlet çeperçilik akademiýasynda «Maddy däl medeni mirasy öwrenmegiň milli tejribesi» atly döredijilik duşuşygy geçirildi. Bu döredijilik duşuşygynyň çäginde türkmen milli gymmatlyklarynyň - halyçylyk, zergärçilik we keramika sungatynyň naýbaşy nusgalarynyň sergisi guraldy. Sergide zergärçilik önümlerini ýasamagyň usullary, keramika sungatynyň kämil önümlerini taýýarlamagyň tärleri, halyçylyk sungatynyň inçe tilsimleri hakynda giňişleýin düşünje berýän ussatlyk sapaklary görkezildi. Goý, Türkmenistan döwletimiz bilen ÝUNESKO-nyň arasyndaky hoşniýetli halkara hyzmatdaşlygynyň täze belentliklere göterilmegi ugrunda giň gerimli işleri alyp barýan türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, belent maksatly işleri hemişe üstünliklere beslensin. _____________________ Ogultäç HOJANAZAROWA, Maddy däl medeni miras müdirliginiň başlygynyň orunbasary

TÜRKMEN ALABAÝY–MILLI BUÝSANJYMYZ

Kitaphanalar

23.10.2025

Türkmenistanyň Bazar Amanow adyndaky Döwlet çagalar kitaphanasy ýakynda Türkmen Döwlet medeniýet we sungat mekdebinde bilim alýan talyp ýaşlaryň arasynda türkmen alabaýynyň baýramyna bagyşlap «Türkmen alabaýy–milli buýsanjymyz» atly duşuşyk geçirdi.Türkmen alabaýynyň adamyň ýalňyzlykda daşynyň goragçysy, wepadar dosty hasaplanylýar. Bilişimiz ýaly il içinde dürli döwürlerde it bilen baglanyşykly nakyllaryň, aýtgylaryň we tymsallaryň ençemesi döräpdir. Olaryň arasynda «Itim bar–gutym bar», «Itiň demi–süňküň emi», «It batyra üýrer–gorkagy ýarar» ýaly nakyllar çuň many-mazmuna eýe. Türkmen alabaýynyň halkymyzyň ruhy dünýäsinde ýer alandygyna arheologik ýadygärliklerden tapylan tapyndylar hem şaýatlyk edýär. Bular barada Gahryman Arkadagymyzyň «Türkmen alabaýy» atly ajaýyp kitabynda hem öz aýdyň beýanyny tapypdyr. Her ýylyň oktýabr aýynyň soňky ýekşenbesinde giňden bellenilýän türkmen alabaýynyň baýramy hem-de «Türkmenistanyň halk itşynasy», «Türkmenistanyň at gazanan itşynasy» diýen hormatly atlaryň döredilmegi, Halkara «Türkmen alabaý itleri» assosiasyýasynyň döredilmegi türkmen alabaýlarynyň şan-şöhratyny dünýä ýaýmak bilen baglanyşykly maksatnamalaýyn işleriň üstünlikli dowam edýänliginiň subutnamasy bolup durýar. Ine bular dogrusynda dabaranyň dowamynda buýsançly gürrüňler edildi. Duşuşygyň ahyrynda oňa gatnaşanlar her bir işde şol sanda milli medeni mirasymyzy, alabaý itleri ýaly milli gymmatlyklarymyzy sarpalamakda-da nusgalyk mekdep bolýan Gahryman Arkadagymyzyň we Arkadagly Gahryman Serdarymyzyň janlarynyň sag, ömürleriniň uzak bolmagyny arzuw etdiler.

HALKARA NEBITGAZ FORUMY: INNOWASIÝALAR WE ÖZARA BÄHBITLI HYZMATDAŞLYGYŇ MÜMKINÇILIKLERI

Täzelikler

23.10.2025

22-nji oktýabrda Türkmenistanyň Söwda-senagat edarasynyň binasynda «Türkmengaz», «Türkmennebit» döwlet konsernleriniň guramagynda «Türkmenistanyň nebiti we gazy-2025» atly XXX halkara maslahat we sergi öz işine başlady. Ählumumy we sebit meýilleri, syýasy strategiýalar, kadalaşdyryjy hukuk binýadyny kämilleşdirmek boýunça dialog arkaly energetika hyzmatdaşlygyny pugtalandyrmak, Türkmenistanyň ýangyç-energetika toplumynyň durnukly ösüşini üpjün etmek maksady bilen, döwlet hem-de hususy düzümleriň arasynda strategik hyzmatdaşlygy ýola goýmaga ýardam bermek, geljegi uly nebitgaz taslamalary bilen tanyşdyrmak, energetika merkezi hökmünde Türkmenistanyň eýeleýän ornuny öwrenmek arkaly sebitde energetika özara baglanyşygyny ösdürmek şu gezekki çäräniň esasy maksadydyr. Utgaşykly görnüşde geçirilýän giň gerimli foruma dünýäniň onlarça ýurdundan wekiller gatnaşýarlar. Tebigy gazyň ägirt uly gorlaryna eýe bolan Türkmenistan häzirki wagtda bu tebigy baýlygyny durnukly ösüşiň hereketlendiriji güýjüne öwürýär. Ýurdumyz diňe bir çig mal eksporty bilen çäklenmän, köpugurly, ýokary goşulan bahaly we ekologiýa taýdan arassa energetika ekoulgamyny döretmäge gönükdirilen syýasaty durmuşa geçirýär. Bu strategiýanyň çäklerinde ýurdumyz daşary ýurtly hyzmatdaşlary bilen eksport ugurlaryny diwersifikasiýalaşdyrmak, gaýtadan işleýän senagaty ösdürmek hem-de döwrebap energetika we himiýa klasterlerini döretmek boýunça giň gerimli işleri amala aşyrýar. Ýangyç-energetika toplumynyň eksport mümkinçiliklerini giňeltmek maksady bilen, bar bolan turba geçirijileriň ygtybarlylygyny pugtalandyrmak, suwuklandyrylan gazy öndürmek boýunça taslamalary işläp taýýarlamak hem-de olary goldamak, sebit başlangyçlarynyň çäklerinde täze energetika geçelgelerini döretmek boýunça yzygiderli işler alnyp barylýar. Türkmenistan ýokary goşulan bahaly önümçiligi ösdürmäge hem aýratyn üns berýär. Ammiagyň, mineral dökünleriň, polimerleriň we beýleki nebithimiýa önümleriniň önümçiligine uly maýa goýumlar gönükdirilýär. Munuň özi täze iş orunlaryny döretmek bilen bir hatarda, ugurdaş pudaklary ösdürmäge hem-de daşary ýurt tehnologiýalaryny çekmäge ýardam berýär. Uglewodorod serişdelerini çykarmak hem-de gaýtadan işlemek prosesiniň netijeliligini we howpsuzlygyny ýokarlandyrmak maksady bilen, döwrebap sanly çözgütler işjeň ornaşdyrylýar. Sanlylaşdyrmak pudagyň durnukly ösüşini üpjün etmegiň we onuň maýa goýumlar üçin özüne çekijiligini artdyrmagyň esasy şerti bolup çykyş edýär. Şunuň bilen birlikde, pudagyň işgärler kuwwatyny pugtalandyrmaga aýratyn üns berilýär. Şu maksat bilen täze okuw merkezleri döredilýär, halkara hyzmatdaşlar bilen tejribe alyşmak maksatnamalary durmuşa geçirilýär. Şeýlelikde, iri infrastruktura taslamalaryny amala aşyrmak, nebithimiýa senagatyny ösdürmek, pudagy sanlylaşdyrmak hem-de döwrebaplaşdyrmak boýunça durmuşa geçirilýän tagallalar ýurdumyzyň uzak möhletleýin ösüşi maksat edinýändigini görkezýär. Bu yzygiderli strategiýa energiýa serişdelerini milli ykdysadyýetimiziň ösüşiniň binýadyna öwrüp, halkara hyzmatdaşlyk üçin täze mümkinçilikleri açýar. ____________________ «Türkmenistan» gazeti

TÜRKMENISTANYŇ PREZIDENTI «ENOC» HEM-DE «DRAGON OIL» KOMPANIÝALARYNYŇ ÝOLBAŞÇYLARYNY KABUL ETDI

Täzelikler

23.10.2025

22-nji oktýabrda hormatly Prezidentimiz Serdar Berdimuhamedow «Emirates National Oil Company (ENOC)» hem-de «Dragon Oil» kompaniýalarynyň başlygy Said Al Taýeri, şeýle hem «Dragon Oil» kompaniýasynyň müdiriýetiniň başlygynyň wezipesini wagtlaýyn ýerine ýetiriji Abdulkarim Al Maazmini kabul etdi. Işewürler bildirilen myhmansöýerlik üçin hoşallyklaryny beýan edip, ýurdumyzyň ýangyç-energetika toplumyny diwersifikasiýa ýoly bilen ösdürmek boýunça durmuşa geçirilýän döwlet syýasatynyň üstünliklere beslenýändigini, Türkmenistanyň kuwwatly energetika döwleti hökmünde halkara giňişlikde abraýynyň barha artýandygyny bellediler. Şeýle hem olar Birleşen Arap Emirlikleriniň Prezidenti Şeýh Mohammed bin Zaýed Al Nahaýýanyň, wise-prezidenti, Premýer-ministri, Dubaýyň häkimi Şeýh Mohammed bin Raşid Al Maktumyň hem-de wise-prezidenti, Premýer-ministriniň orunbasary, Prezidentiň iş dolandyryş ministri Şeýh Mansur bin Zaýed Al Nahaýýanyň döwlet Baştutanymyza hem-de Gahryman Arkadagymyza iberen mähirli salamyny we iň gowy arzuwlaryny ýetirdiler. Işewürler amatly maýa goýum ýagdaýy döredilen Türkmenistanda iş alyp barmagyň özleri üçin uly hormatdygyny belläp, netijeli işlemäge berýän yzygiderli goldawlary üçin döwlet Baştutanymyza hem-de Gahryman Arkadagymyza hoşallyklaryny beýan etdiler. Hormatly Prezidentimiz hoşniýetli sözler üçin minnetdarlyk bildirip, Birleşen Arap Emirlikleriniň ýolbaşçylaryna iň gowy arzuwlaryny beýan etdi. Döwlet Baştutanymyz myhmanlaryň saparynyň dowamynda «Türkmenistanyň nebiti we gazy-2025» atly halkara maslahata we sergä gatnaşjakdyklaryny, ýurdumyzda bu ulgamda alnyp barylýan işler, ýetilen sepgitler bilen tanyşjakdyklaryny aýtdy hem-de olaryň geçirjek duşuşyklarynyň nebitgaz pudagynda ikitaraplaýyn gatnaşyklary mundan beýläk-de ösdürmäge we pugtalandyrmaga ýardam berjekdigine ynam bildirdi. Duşuşygyň dowamynda bellenilişi ýaly, häzirki wagtda Türkmenistan bilen Birleşen Arap Emirlikleriniň arasyndaky gatnaşyklar ikitaraplaýyn derejede, şeýle hem Birleşen Milletler Guramasynyň we beýleki halkara guramalaryň çäklerinde, däp bolşy ýaly, birek-birege hormat goýmak we özara düşünişmek esasynda depginli ösdürilýär. Häzirki wagtda nebitgaz pudagy ýurdumyzyň iň bir depginli ösýän pudaklarynyň biridir. Bu pudagy ösdürmegiň strategiýasy, esasan-da, ýerli çig maly ulanmak arkaly, milli ykdysadyýetimiziň pudaklary üçin zerur bolan, şeýle hem eksport ugurly önümleri öndürmäge gönükdirilendir. Şunuň bilen baglylykda, «Dragon Oil» kompaniýasy bilen hyzmatdaşlygyň toplanan oňyn tejribesi bellenildi. ___________________ «Türkmenistan» gazeti

TÜRKMENISTANYŇ PREZIDENTI HINDISTAN RESPUBLIKASYNYŇ ADATDAN DAŞARY WE DOLY YGTYÝARLY ILÇISINI KABUL ETDI

Täzelikler

23.10.2025

22-nji oktýabrda hormatly Prezidentimiz Serdar Berdimuhamedow Hindistan Respublikasynyň Türkmenistanda täze bellenilen Adatdan daşary we Doly ygtyýarly ilçisi Bandaru Wilsonbabuny kabul etdi. Ol döwlet Baştutanymyza ynanç hatyny gowşurdy. Diplomat duşuşmaga döredilen mümkinçilik üçin hoşallyk bildirip, giň gerimli özgertmeler ýoly bilen ynamly öňe barýan Türkmenistanda Hindistana wekilçilik etmegiň özi üçin uly hormatdygyny belledi hem-de mümkinçilikden peýdalanyp, Hindistan Respublikasynyň Prezidenti Draupadi Murmunyň we Premýer-ministri Narendra Modiniň hormatly Prezidentimize hem-de Gahryman Arkadagymyza iberen mähirli salamyny, iň gowy arzuwlaryny beýan etdi. Döwlet Baştutanymyz hoşniýetli sözler üçin minnetdarlyk bildirip, dostlukly ýurduň ýolbaşçylaryna iň gowy arzuwlaryny beýan etdi. Hormatly Prezidentimiz Bandaru Wilsonbabuny ýokary diplomatik wezipä bellenmegi mynasybetli gutlap, oňa iki ýurduň arasyndaky köpugurly gatnaşyklary mundan beýläk-de ösdürmäge gönükdirilen işinde uly üstünlikleri arzuw etdi. Duşuşygyň dowamynda bellenilişi ýaly, Türkmenistan Hindistan Respublikasy bilen däp bolan dostlukly gatnaşyklaryň we ýakyn hyzmatdaşlygyň ösdürilmegine möhüm ähmiýet berýär. Häzirki wagtda ýurtlarymyzyň arasyndaky ikitaraplaýyn gatnaşyklar syýasy-diplomatik, söwda-ykdysady, energetika, ulag, bilim we medeni-ynsanperwer ulgamlarda üstünlikli ösdürilýär. Döwletara gatnaşyklar özara hormat goýmak we birek-birege goldaw bermek ýörelgelerine esaslanýar. Bu bolsa, öz gezeginde, ikitaraplaýyn derejede, şeýle hem abraýly halkara guramalaryň çäklerinde hyzmatdaşlygy yzygiderli ösdürmek üçin berk binýat bolup hyzmat edýär. Türkmen-hindi gatnaşyklarynyň gün tertibinde söwda-ykdysady we energetika ulgamlaryndaky hyzmatdaşlyk aýratyn orun eýeleýär. Şunuň bilen baglylykda, özara ykdysady hyzmatdaşlygy ösdürmek, ilkinji nobatda, energetika we ulag pudaklarynda hyzmatdaşlyk üçin giň mümkinçilikleriň bardygy bellenildi. Bellenilişi ýaly, ýurdumyz Türkmenistan-Owganystan-Pakistan-Hindistan (TOPH) transmilli gaz geçirijisiniň we onuň bilen ugurdaş ulag geçelgeleriniň taslamalarynyň durmuşa geçirilmegini mundan beýläk-de işjeňleşdirmek ugrunda çykyş edýär. Bu geljegi uly taslamalar sebitde energiýa howpsuzlygyny üpjün eder we gatnaşyjy ýurtlaryň ykdysady ösüşine uly itergi berer. ___________________________ «Türkmenistan» gazeti

KITAP –AJAÝYP DÜNÝÄ

Kitaphanalar

22.10.2025

Türkmenistanyň Döwlet medeniýet merkeziniň Döwlet kitaphanasynyň Seýrek neşirler bölümiň okalga zalynda “Kitap –ajaýyp dünýä ” atly kitaphana syny geçirildi. Berkarar döwletiň täze eýýamynyň Galkynyşy döwründe has takygy, 2025-nji ýyly “ Halkara parahatçylyk we ynanyşmak ýyly ” diýip atlandyrylýan ýylymyzda dünýä edebiýatynyň altyn hazynasyna giren baý hem-de gymmatly edebi mirasyny öwrenmekde möhüm ähmiýete eýe bolýar. Türkmen halkynyň milli Lideri Gahryman Arkadagymyzyň, Hormatly Prezidentimiz Arkadagly Gahryman Serdarymyzyň baştutanlygynda bu günki günde çünki Türkmen halky bilen goňşy halklaryň köpasyrlyk taryhy kökleri, medeni we ruhy gymmatlyklaryň umumylygy baglanyşdyrýar. Dost-doganlyk ýurtlarymyzyň kitaplary Türkmenistanyň Döwlet medeniýet merkeziniň Döwlet kitaphanasyň baý gaznasyny has-da baýlaşdyrýar. Şol mynasybetli Döwlet kitaphanasyň Seýrek neşirler bölüminiň okalga zalynda goňşy döwletimiz Azerbeýjan döwletiniň “Azerbeýjan Milli kitaphanasy”-atly kitabynyň gelip gowuşmagy mynasybetli kitaphana syny geçirildi. Bu kitap Azerbeýjanyň Milli kitaphanasynyň 100 ýyllygyna bagyşlanan. Kitap ýokary derejede çap bolup Milli kitaphanasy barada maglumatlar giňden beýan edilýär. Kitaphana syna Türkmenistanyň Telekommunikasiýalar we informatika institutynyň 1-nji ýyl talyplarynyň gatnaşmagynda hem-de Aşgabat şäherindäki 132-nji ýöriteleşdirilen orta mekdebiň ýokary synyp okuwçylarynyň gatnaşmagynda kitap sergisi hem geçirildi. Sergimizde Gahryman Arkadagymyzyň, Hormatly Prezidentimiz Arkadagly Gahryman Serdarymyzyň jöwher paýhasyndan syzylyp çykan ajaýyp kitaplary ýaýbaňlandyryldy. Kitap sergi bölümiň okalga zalynda geçirildi. Kitaphana syna we kitap sergä gatnaşanlarda uly täsir galdyrdy. Şeýle-de edebi mirasy öwrenmek işini düýpli ýola goýmak bilen, halkymyza asyrlaryň jümmüşinden gözbaş alýan ýol-ýörelgeleri, däp-dessurlary, täzeden dikeltmeklige, medeni we ruhy mirasyň il-günüň köňül ganatyna öwrülmegine giň mümkinçilik döredip beren Türkmen halkynyň milli Lideri Gahryman Arkadagymyzyň Hormatly Prezidentimiz Arkadagly Gahryman Serdarymyzyň janlarynyň sag bolmagyny, ömürleriniň uzak bolmagyny, alyp barýan döwletli işleriniň rowaçlyklara beslenmegini tüýs ýüregimizden arzuw edýäris.

DÖWLET KITAPHANASYNA GEZELENÇ

Kitaphanalar

22.10.2025

Türkmenistanyň Döwlet medeniýet merkeziniň Döwlet kitaphanasynda 132-nji Ýöriteleşdirilen orta mekdebiň okuwçylary gezelençde boldular. Ýaş nesillerimiziň kitaba bolan söýgüsini ösdürip, olara kitaby goramagyň we goramak üçin kitaphanamyzyň alyp barýan iňňän inçe tilsimleri bilen tanyşdyrmakda kitaphana işgärleri giňişleýin maglumatlar berdiler. Sebäbi kitap bilen dost bolmak beýik gelejege ýol salmak diýmekdir. Gahryman Arkadagymyzyň, Arkadagly Gahryman Serdarymyzyň kitaphanamyza peşgeş berýän müňýyllyklaryň manysyny özünde jemleýän ajaýyp kitaplary bilen tanyşan ruhy belent ýaşlarymyz kitaphanalar bilen mydama aragatnaşykda boljakdyklaryny uly buýsanç bilen bellediler. Gezelenje gatnaşan ýurdumyzyň gelejegi bolan ýaş nesillerimiz, ýaşlara bilim almaga döredilýän mümkinçilikler üçin türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza çaga kalplaryndan çuňňur alkyş aýtdylar.

ALTYN GÜÝZÜŇ WASPY

Täzelikler

22.10.2025

2025-nji ýylyň 21-nji oktýabrynda Türkmenistanyň Medeniýet ministrliginiň guramagynda, Aşgabat şäherinde durky täzelenen Türkmenistanyň Garaşsyzlygynyň XV ýyllygy seýilgähinde, ýurdumyzyň şahyrlarynyň «Altyn güýzüň waspy» atly aýdyşyk äheňli çeper okaýyşlary geçirildi. Bolçulygyň, rysgal-bereketiň hem-de özboluşly gözelligiň pasly bolan güýz döredijilik adamlarynyň pikir-garaýyşlarynyň, duýgularynyň has-da kämilleşmegine uly täsirini ýetirýär. Şonuň üçin güýzde ýazylan eserler manyly kämil pikirlere baý bolup, kalbyňy täze oý-hyýallara doldurýar. Ynha, şeýle pikir-garaýyşlar «Altyn güýzüň waspy» atly aýdyşyk äheňli çeper okaýyş çäresinde çykyş eden, Türkmenistanyň at gazanan medeniýet işgäri, halypa şahyr Oguljemal Çaryýewanyň, «Türkmenistan» gazetiniň bölüm redaktory, şahyr Akmyrat Hojanyýazowyň, «Watan» gazetiniň bölüm redaktory, şahyr Çemen Annaberdiýewanyň, «Edebiýat we sungat» gazetiniň uly habarçysy, ýaş şahyr Kerimberdi Hakberdiýewiň goşgularynyň içinden eriş-argaç bolup geçdi. Altyn güýzüň gözellikleri her bir adamyň kalbyna döredijilik ylhamyny, täsin pikirleri eçilýär. Hoşboý ysly gülleriň, altynsow öwüsýän daragtlaryň özboluşly ysy, seriňi durlap, kalbyňy heýjana getirýär. Tebigatyň tylla reňke boýan baglarynyň gatyrawsy ýapraklary diýseň özüne çekiji. Altyn güýzde goýny gözellige beslenen seýilgähiň görnüşini synlamagyň özem aýratyn lezzet berýär. Paýtagtymyzyň gözel künjeginde ýerleşýän döwrebaplaşdyrylan Türkmenistanyň Garaşsyzlygynyň XV ýyllygy seýilgähiniň al-elwan gülli, bagy-bossanly tebigaty ajaýyp döwrümiziň ösüş-özgerişlerine buýsanjymyzy artdyryp, kalby ylham-joşgunly şahyrlarymyzda ýakymly duýgulary oýardy. Berkarar döwletiň täze eýýamynyň Galkynyşy döwründe, Garaşsyz ýurdumyzyň hemişelik Bitaraplygynyň şanly 30 ýyllygynyň taryhy dabaralara beslenip giňden bellenilýän Halkara parahatçylyk we ynanyşmak ýylynda, şahyrlarymyzyň ýüreginden syzylyp çykan şygyrlaryny okaýyşlary has-da täsirli boldy. Her bir şygyrda parahat Watanymyza hem-de tebigatymyza bolan çäksiz hormat-sarpa aýdyň duýuldy. Seýilgähde ildeşlerimiziň rahat dynç almagy, şadyýan çagalaryň wagtlaryny peýdaly geçirmekleri üçin ähli zerur sertler döredilen. Bu seýilgähe dynç almaga gelýän bagtyýar raýatlaryň köplügini göreniňde guwanýarsyň. «Altyn güýzüň waspy» atly aýdyşyk äheňli çeper okaýyş çäresine gatnaşyp çykyş eden şahyrlarymyz, medeniýetimizi, sungatymyzy, edebiýatymyzy gülledip ösdürýän, türkmen halkynyň Milli Lideri Gahryman Arkadagymyzyň, hormatly Prezidentimiziň janlarynyň sag, ömürleriniň uzak, döwletli işleriniň hemişe rowaç bolmagyny tüýs ýürekden arzuw etdiler. _________________ Ogulgurban GAŞLAKOWA Türkmenistanyň Medeniýet ministrliginiň Döredijilik işgärleri bölüminiň baş hünärmeni.

BIZ KITAPHANA BARÝARYS...

Kitaphanalar

22.10.2025

Türkmenistanyň Bazar Amanow adyndaky Döwlet çagalar kitaphanasyna ýakynda ýörite çagalar üçin bilim merkezinde bilim alýan dürli ýaşdaky körpejeler gezelenje geldiler. Kitaphana hünärmenleri ýaşajyk kitapsöýüjileri güler ýüz bilen garşy alyp, kitaphanamyzda hereket edýän birnäçe bölümler bilen tanyşdyrdylar. Hem-de özleriniň ýaş aýratynlyklaryna kybap gelýän «Kiçi ýaşly okyjylara hyzmat etmek» bölüminiň golasty hazynasynda ýerleşdirilen söýgüli ertekileri we şol ertekileri döredýän awtorlaryň ömri we döredijiligi bilen gysgaça tanyşdyryldy. Gezelenje gelen körpeje myhmanlarymyz kitaphanamyza gelmek bilen, ruhy baýlyklaryň jemlenen medeni ojagynda kitap bilen dostlaşmak we kitaby saýlap almak barada kitaphana hünärmenleriniň beren maslahatlaryndan hoşal bolandyklaryny beýan etdiler. Gezelenjiň ahyrynda oňa gatnaşanlar özüniň many-mazmun baýlygy hem-de çeperçilik taýdan örän ýokary usullarda kitap neşir etmeklikde beýik işleri durmuşa geçirýän türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza alkyşlary beýan etdiler.

2025-NJI ÝYLYŇ 24-26-NJY OKTÝABRY ARALYGYNDA ÝURDUMYZYŇ TEATRLARYNDA GÖRKEZILJEK SAHNA OÝUNLARYNYŇ TERTIBI

Teatr we kino dünýäsi

22.10.2025

TÜRKMENISTANYŇ BEÝIK SAPARMYRAT TÜRKMENBAŞY ADYNDAKY BAŞ AKADEMIKI DRAMA TEATRYNDA 25.10.2025ý. «Gülki agşamy» sagat 19:00 26.10.2025ý. «Nadaranyň nogtalanyşy» sagat 19:00 _______________________ TÜRKMENISTANYŇ MAGTYMGULY ADYNDAKY MILLI SAZLY DRAMA TEATRYNDA 25.10.2025ý. «Durmuş diňe düýş däl» sagat 19:00 26.10.2025ý. «Gurbannazar Ezizow» sagat 19:00 _______________________ TÜRKMENISTANYŇ ALP ARSLAN ADYNDAKY MILLI DRAMA TEATRYNDA 24.10.2025ý. «Söýgi duralagasy» sagat 19:00 25.10.2025ý. «Magnitafon» sagat 19:00 26.10.2025ý. «Geliň gülşeliň» sagat 19:00 _______________________ A.S.PUŞKIN ADYNDAKY DÖWLET RUS DRAMA TEATRYNDA 24.10.2025ý. «Исполнитель желаний» sagat 19:00 25.10.2025ý. «Алладин и волшебная лампа» sagat 12:00 25.10.2025ý. «Аршин мал алан» sagat 19:00 26.10.2025ý. «Золушка» sagat 11:00 26.10.2025ý. «Золушка» sagat 13:00 26.10.2025ý. «Когда сияет душа молодая» sagat 19:00 _______________________ TÜRKMENISTANYŇ MOLLANEPES ADYNDAKY TALYPLAR TEATRY 25.10.2025ý. «Sakawyň soňuna seret» sagat 19:00 26.10.2025ý. «Amanat giýew» sagat 19:00 _______________________ ARKADAG ŞÄHERINIŇ AMAN GULMÄMMEDOW ADYNDAKY DÖWLET DRAMA TEATRY 25.10.2025ý. «Şowhunly tomaşa» sagat 19:00 26.10.2025ý. «Saňa ýalan maňa çyn» sagat 19:00 _______________________ TÜRKMEN DÖWLET GURJAK TEATRY 25.10.2025ý. «Maşa we aýy» sagat 17:00 25.10.2025ý. «Alladin» sagat 19:00 26.10.2025ý. «Balykçy we balyjak» sagat 12:00 26.10.2025ý. «Balykçy we balyjak» sagat 17:00 26.10.2025ý. «Aşyklar» sagat 19:00 _______________________ BALKAN WELAÝATYNYŇ BEÝIK SAPARMYRAT TÜRKMENBAŞY ADYNDAKY DÖWLET DRAMA TEATRY 24.10.2025ý. «Garry möjek» sagat 17:00 25.10.2025ý. «Gumly gelin» sagat 19:00 26.10.2025ý. «Bir güniň aladasy» sagat 19:00 _______________________ DAŞOGUZ WELAÝATYNYŇ N.ANDALYP ADYNDAKY DÖWLET SAZLY DRAMA TEATRY 25.10.2025ý. «Saňa ýalan maňa çyn» sagat 18:00 26.10.2025ý. «Gülki agşamy» sagat 18:00 _______________________ LEBAP WELAÝATYNYŇ SEÝITNAZAR SEÝDI ADYNDAKY DÖWLET SAZLY DRAMA TEATRY 25.10.2025ý. «Kalba siňen owazlar» sagat 19:00 26.10.2025ý. «Söz aýdyş» sagat 19:00 _______________________ MARY WELAÝATYNYŇ KEMINE ADYNDAKY DÖWLET DRAMA TEATRY 25.10.2025ý. «Ýegşerme goja ýegşerme» sagat 19:00 26.10.2025ý. «Altyn jüýje» sagat 17:00 26.10.2025ý. «Dowamat» sagat 19:00

• ←
• 1
• ...
• 48
• 49
• 50
• ...
• 246
• →