Muzeýler
20.05.2026Türkmenistanyň Döwlet medeniýet merkeziniň Döwlet muzeýi 2026-njy ýylyň 21-nji maýynda sagat 10:00-da Aşgabat şäheriniň güni mynasybetli “Arzuwlaryň ak şäheri” atly gurnalan serginiň açylyş dabarasyna çagyrýar. Biziň salgymyz: Arçabil şaýolunyň 50-nji jaýy Habarlaşmak üçin tel: 48-25-92
Muzeýler
15.05.2026Türkmenistanyň Beýik Saparmyrat Türkmenbaşy adyndaky şekillendiriş sungaty muzeýinde 2026-njy ýylyň 21-nji maýynda «Aşgabat – Watanymyzyň göwher gaşy» atly sergisiniň açylyş dabarasyna çagyrýarys. Sergi sagat 11:00-da açylýar. Biziň salgymyz: Aşgabat ş. (A.Nowaýy) 2022. köçesiniň 88-nji jaýy Habarlaşmak üçin tel: 92-71-69
Muzeýler
15.05.2026Hormatly Prezidentimiziň parasatly ýolbaşçylygynda halyçylyk sungatyna berilýän goldawyň netijesinde ýurdumyzyň medeni mirasynyň iň gymmatly hazynasy bolan bu sungat kämillik derejesine çykarylyp, ösdürilýär. Türkmen halyçylyk sungaty özüniň gözbaşyny gadymdan alyp gaýdýar.«El hünäri il gezer» diýlişi ýaly, asyrlar-dan-asyrlara aşyp, häzirki bagtyýarlyk zamanamyzda gelin-gyzlarymyz tarapyndan sünnälenip dokalýan inçe sungatymyz öz nepisligi, mizemez owadan öwüşginliligi bilen tapawutlanyp, onda ata-babalarymyzyň taryhy we medeniýeti barada syrly, gymmatly maglumatlar jemlenýär. Türkmeniň haly sungatynda şanly geçmişimiz, şu günümiz hem geljegimiz wasp edilýär. Häzirki döwrüň talaplaryna laýyk edip dokalýan haly önümleri çitme we kakma görnüşlerinde dokalýar. Türkmen haly we haly önümleriniň gadymy nusgalary dikeldilip, halylaryň hili, reňki, görnüşleri döwrebaplaşyp, göllerinde, nagyşlarynda ýagty reňkler ulanylyp, haly sungatynda uly ösüşlere, özgerişlere eýe bolýar. Halyçylyk sungatynyň döremegine we kämilleşmegine ýardam beren esasy şertleriň birnäçesiniň keremli topragymyzda jemlenendigini bellemek buýsançlydyr. Halyda türkmeniň kalby bar. Bu inçe sungatyň dünýä halklarynyň kalbynyň töründe orun almagyň syry hem şundadyr. Gelin-gyzlarymyz tarapyndan sünnälenip dokalýan türkmen halysy hem çeper elleriň astynda ösüpdir, özgeripdir we kämilleşipdir. Ýurdumyzda çeper halyçylyk kärhanalary köpelip, dokmaçy gelin-gyzlarymyzyň sany gün-günden artýar. Türkmen zenanynyň ezber ussa meňzedilmeginiň hem halylaryň nepis dokalyşy bilen baglydygyna göz ýetirmek kyn däl. Çünki haly dokamak sungaty iňňe bilen guýy gazan ýaly ussatlygy, ezberligi talap edýän el hünäridir. Zenanlaryň mähri, yhlasy, söýgüsi siňdirilip dokalýan halylar öýleriň, baýramçylyk dabaralarynyň bezegidir. Haly türkmen halkynyň ykbalyna badaşan mukaddes sungatdyr. Haly türkmen halkynyň durmuşyna, ýaşaýşyna çalymdaş bolup, türkmen öýüniň törüniň bezegidir, bedew atlarynyňdyr kejebeli düýeleriniň zynatydyr. Türkmen halysy - türkmen halkynyň medeni gymmatlyklarynyň esaslarynyň biridir. Ussat türkmen halyçylary köp asyrlaryň dowamynda özboluşly halyçylygyň aýratynlyklaryny gorap saklapdyrlar. Haly sungatyna hem-de ol gudraty döreden halyçy ene-mamalarymyza aýratyn hormat-sarpa goýýan Arkadagly Serdarymyz elmydama türkmen halylaryny öwrenmek, milli mirasymyz hökmünde gorap saklamak, gadymy hem müdimi senedimizi ýaşlara miras goýmak barada yzygiderli nygtaýar. Gahryman Arkadagymyz „Paýhas çeşmesi“ atly eserinde „Gözelligi, nepisligi, öwşün atýan reňkleri bilen göreni haýrana goýýan halylar halkymyzyň ruhy ahwalydyr“ diýip belleýär. Türkmen halkynyň durmuşyny halysyz göz öňüne getirmek asla mümkin däl. Türkmen halkynyň kalbyny ýyladýan halylar biziň döwletli ojaklarymyzy, köşk-eýwanlarymyzy bezeýär. Bu gün türkmen halylarynyň şöhraty dünýä doldy. Ol halylar indi dünýäniň islendik ýurdunda tanalýar. Dünýäde deňsiz taýsyz sungat eseri hökmünde Ginnesiň rekordlar kitabyndan mynasyp orun alan türkmen halysy ÝUNESKO-nyň adamzadyň maddy däl medeni mirasynyň görnükli nusgalarynyň sanawyna girizilmegi bolsa, onuň halkara derejedäki hormatyny we sylagyny ýene-de bir gezek bütindünýä aýan etdi. Türkmen haly sungatynyň dünýä meşhurlygyny gazanmakda giň mümkinçilikleri döreden, gadymy hem müdimi senedimiz bolan ajaýyp halylarymyza goýýan belent sarpasy üçin Arkadagly Serdarymyza alkyşlarymyz çäksizdir. Her bir işde nusga bolup, halkymyzy şeýle eşretli günlere getiren Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun, tutýan tutumly işleri rowaçlyklara beslensin! Nowça BABANYÝAZOWA, Lebap welaýat taryhy we ülkäni öwreniş muzeýiniň hünärmeni
Muzeýler
13.05.2026Berkarar döwletiň täze eýýamynyň Galkynyşy döwründe ýurdumyzyň Baş kanuny bolan Konstitusiýamyz we Döwlet Baýdagymyz, Watanymyzyň Garaşsyzlyk hem-de Bitaraplyk ýörelgelerini we agzybir türkmen halkymyzyň parahatçylyk, döredijilik, ynsanperwerlik we hoşniýetlilik gatnaşyklaryna bolan üýtgewsiz ygrarlylygyny özünde jemleýär. Bu gün hem Türkmenistanyň Şekillendiriş sungaty muzeýinde Türkmenistanyň Konstitusiýasynyň we Türkmenistanyň Döwlet Baýdagynyň gününe bagyşlanan “Goşa mukaddesligiň baýramy” atly sergi gurnaldy. Sergide nakgaşçylyk we grafika sungatyna degişli ussat halypalarymyzyň ýerine ýetiren eserlerini görmek bolar. Goşa mukaddesligimiz bolan Türkmenistanyň Konstitusiýasynyň we Döwlet Baýdagynyň şanyna uludan toýlaryň tutulmagy watansöýüjiligimiz bilen berk baglydyr. Halkymyzy baky bagtyýarlyga ýetiren Gahryman Arkadagymyzyň we Arkadagly Gahryman Serdarymyzyň adyna ýürekden çykýan alkyşlarymyzy aýdýarys. Gahryman Arkadagymyzyň we Arkadagly Gahryman Serdarymyzyň janlary sag, ömürleri uzak, tutýan tutumly işleri rowaçlyklara beslensin! Döwlet Baýdagymyzyň we Esasy Kanunymyzyň şanyna tutuljak toýlar gutly bolsun!
Muzeýler
13.05.2026Adamy jemgyýetiň we döwletiň iň ýokary gymmatlygy hökmünde ykrar edýän Konstitusiýamyz, Garaşsyzlygymyzyň we Bitaraplygymyzyň, agzybirligimiziň hemde jebisligimiziň ebediliginiň nyşanyna öwrülen Döwlet baýdagymyz biziň geçmişimiziň, häzirki döwrümiziň, geljegimiziň beýikdigini, şöhratlydygyny alamatlandyrýan milli mukaddesliklerimizdir. Esasy Kanunymyzyň we Döwlet baýdagymyzyň şanyna tutulýan toýlar halkymyzyň gadymyýetden biziň günlerimize çenli gelip ýeten asylly däpleriniň, milli ýörelgeleriniň dowamatydyr. Toýlary goşa-goşadan tutulýan türkmen halkynyň ýokary döredijilik ruhy, milli döwletlilik ýörelgeleri bu baýramçylykda mynasyp beýanyny tapýar. Konstitusiýa biziň milli döwletliligimiziň, jemgyýetçilik gatnaşyklarymyzyň beýany bolsa, baýdak halkymyzyň tutuş dünýäde ykrar edilmeginiň aýdyň güwäsidir. Baýdak milli buýsançdyr. Baýdak dowamatdyr. Türkmenistanyň Döwlet medeniýet merkeziniň Döwlet muzeýinde “Kämil hukuk binýady” atly sergi geçirildi. Sergini Türkmenistanyň Döwlet medeniýet merkeziniň Döwlet muzeýiniň Mahabat we neşir işleri bölüminiň müdiri Bossan Ataýewa açdy. Sergide Türkmenistanyň Mejlisiniň deputaty, Türkmenistanyň Mejlisiniň Ýerli wekilçilikli häkimiýet we özözüňi dolandyryş edaralary bilen işlemek baradaky komitetiniň agzasy Çemen Rejepowa, Türkmenistanyň Prezidentiniň ýanyndaky Döwlet gullugy akademiýasynyň Jemgyýeti öwreniş ylymlary kafedrasynyň uly mugallymy, ilkinji zenanlar guramasynyň başlygy Gülşirin Hanowa, Türkmenistanyň Ylymlar akademiýasynyň Taryh we arheologiýa institutynyň Gadymy we orta asyrlar taryhy bölüminiň uly ylmy işgäri Sähra Ýusupowa, Türkmenistanyň Döwlet medeniýet merkeziniň Döwlet kitaphanasynyň kitap saklamak bölüminiň bölümçe müdiri Gülaýym Saparmedowa çykyş etdiler. Türkmenistanyň Döwlet medeniýet merkeziniň Döwlet muzeýinde gurnalan sergide çykyş edenler Esasy Kanunymyzyň we Döwlet baýdagymyzyň şanyna tutulýan toýlar halkymyzyň gadymyýetden biziň günlerimize çenli gelip ýeten asylly däpleriniň, milli ýörelgeleriniň dowamatydyny, Berkarar döwletiň täze eýýamynyň Galkynyşy döwründe ata Watanymyzyň ýaşyl tugunyň halkymyzyň agzybirligini we jebisligini, onuň parahatçylyk, ynsanperwerlik, döredijilik ýörelgelerine ygrarlydygyny alamatlandyrýandygyny nygtadylar. Şeýle-de Konstitusiýamyzyň döwlet gurluşynyň milli usulyny, türkmen halkynyň däpdessurlaryny we umumadamzat gymmatlyklaryny özünde jemleýändigi bellenildi.
Muzeýler
11.05.2026Türkmenistanyň Döwlet medeniýet merkeziniň Döwlet muzeýi 2026-njy ýylyň 13-nji maýynda sagat 10:00-da Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli “Kämil hukuk binýady” atly gurnalan serginiň açylyş dabarasyna çagyrýar. Biziň salgymyz: Arçabil şaýolunyň 50-nji jaýy Habarlaşmak üçin tel: 48-25-92
Muzeýler
08.05.2026Merdana Watan ogullarynyň Watan ugrundaky söweşlerde görkezen gahrymançylyklary Garaşsyz, baky Bitarap Türkmenistan döwletimiziň ýaş nesilleri üçin Watanyny, eziz halkyňy söýmegiň, onuň erkinligini we azatlygyny gorap saklamagyň beýik mekdebidir. Şonuň üçin Ýeňiş baýramy türkmen halky üçin iň bir mukaddes baýramlaryň biridir. Şu günler ýurdumyzyň ähli künjeginde Beýik Ýeňşiň dabarasyna çäreler yzygiderli geçirilýär. Lebap welaýat taryhy we ülkäni öwreniş muzeýinde bu baýramçylyk mynasybetli “Watan gahrymanlary-mertlik mekdebi” atly wagtlaýyn serginiň açylyş dabarasy geçirildi. Bu gurnalan wagtlaýyn sergide muzeýiň gaznasynda saklanylýan taryhy gymmatlyklarymyzyň birnäçesi görkezildi. Sergide ýerleşdirilen taryhy gymmatlyklarymyz, Garaşsyz, hemişelik Bitarap Türkmenistan döwletimiziň baý medeni ruhy hem milli mirasyny şöhlelendirýän 1941-1945-nji ýyllaryň Beýik Watançylyk uruşyna degişli maglumatlar, uruş ýyllaryň taryhyndan söz açýan türkmenistanly gahrymanlarymyz hakyndaky fotosuratlar, Beýik Ýeňşiň dabaralanyşy we Watan gahrymanlaryna goýulýan hormat-sylagy hem-de Lebap welaýatynyň “Hatyra” we “Şöhrat” kitaplary sergide öz beýanyny tapdy. Türkmen halkynyň merdana ogullarynyň ata Watany goramak üçin şirin janyndan geçip beýik gahrymançylyk, edermenlik görkezmekde bitiren işleri, tylda galan halkyň, gelin-gyzlaryň Beýik Ýeňşe, fronta öz şaý-seplerini, dürli zatlary kömek berýän pursatlarynyň fotosuratlary, şeýle-de uruşda görkezen edermenlikleri üçin Türkmenistanly gahrymanlara dakylan orden, medallar ýerleşdirilen. Bu ekspozisiýada görkezilýän fotosuratlarda gazanylan Beýik Ýeňiş baýramynyň dabaralanyşy, uruşa giden ýigitleriň gaýdyp gelişi, uruş ýyllarynda we uruşdan soňky ýyllarda durmuşda ulanylan ýag çyralar, dürli gaplar, beýleki esbaplar hem-de suratkeşleriň döreden surat eserleri sergilenýär. Diýseň köp tomaşaçylary özünde jemlän sergi täsirliligi bilen tapawutlandy. Dabaraly serginiň açylşygyna gatnaşanlar dünýä halklarynyň dostlukly, parahatçylykly, agzybir we asuda durmuşda ýaşamagy üçin bimöçber aladalary edýän Gahryman Arkadagymyzyň, Arkadagly Gahryman Serdarymyzyň janlarynyň sag, belent başlarynyň aman bolmagyny, tutýan tutumly işleriniň rowaçly menzillerde rowaçlyklara beslenmegini tüýs ýürekden arzuw etdiler. Jennet MYRADOWA, Lebap welaýat taryhy we ülkäni öwreniş muzeýiniň ekskursawody
Muzeýler
06.05.2026Berkarar döwletimiziň täze eýýamynyň Galkynyşy döwründe “Garaşsyz, baky Bitarap Türkmenistan - bedew batly at-myradyň mekany” ýylynda ähli ösüşler babatda bedew bady bilen öňe barýan gözel Diýarymyzyň ähli ýerlerinde Türkmenistanyň Konstitusiýasynyň we Türkmenistanyň Döwlet baýdagynyň baýramçylygy mynasybetli ulydan toýlar tutulýar. Dünýäde näçe millet bar bolsa olaryň her biri öz milli baýdagy bilen tapawutlanýar we tanalýar. Türkmen baýdagy bütin dünýäde parahatçylygyň we abadançylygyň hem-de Hemişelik baky Bitarap döwletimiziň Garaşsyzlygymyzyň nyşanydyr. Başymyzyň täjine, gözümiziň görejine deňelýän ýaşyl Baýdagymyz bu gün bagtyýar zamanamyzyň ýaraşygy bolan köşgi-eýwanlaryň, ajaýyp mermer binalaryň, ýaşaýyş jaýlarynyň depesinde, gün bilen bäsleşip pasyrdaýar. Tug-halkymyz üçin baky mukaddeslikdir. Tutuş dünýä ýüzünde ýurdumyz özüniň ýaşyl baýdagy bilen tanalýar. Garaşsyzlygymyzyň bakylygynyň, bitewiliginiň, sarsmazlygynyň buşlukçysydyr. Halkymyz tuguna sežde etmegi özüne mertebe bilýär. Häzirki wagtda Garaşsyz ýurdumyzyň tugy dünýäniň çar künjünde buýsançly parlap, türkmeniň at owazasyny äleme ýaýýar. Türkmen halky hormatly Prezidentimiziň, baştutanlygynda agzybirlikde, jebislikde döwletimiziň Konstitusiýasynda kepillendirilen hukuk düzgünleri esasynda öz ýaşaýyş–durmuşyny, zähmetini amal etmek bilen, ýurdumyzyň ähli ugurlarda üstünlikli ösdürilmegine goşant goşýar. Döwletimiziň Esasy Kanunynyň taryhy ähmiýetini häsiýetlendirmek bilen, Aşgabat şäherinde 2011–nji ýylyň 18-nji maýynda Türkmenistanyň Konstitusiýa Binasy açyldy. Türkmenistanda her ýylyň 18-nji maýynda Döwlet baýdagynyň we Konstitusiýanyň güni bilelikde dabaraly bellenilip geçilýär. Bu baýramçylyk halkyň öz mukaddesligine bolan uly hormatyny aňladýar. Türkmenistanyň Konstitusiýasy ýurduň Esasy Kanunydyr. Ol döwletiň gurluşyny, adamyň we raýatyň hukuklaryny hem-de borçlaryny kesgitleýän iň ýokary hukuk güýjüne eýe bolan resminamadyr. Türkmenistanyň Konstitusiýasy 1992-nji ýylyň 18-nji maýynda we Türkmenistanyň Döwlet baýdagy 1992-nji ýylyň 19-njy fewralynda kabul edildi. Munuň özi berkarar Watanymyzyň döwlet nyşanlaryna bolan belent sarpadan gözbaş alýar. Türkmenistan döwletimiz Garaşsyzlygyny yglan edeninden soň, 1992-nji ýylda ,,Türkmenistanyň Döwlet baýdagy hakynda’’ Türkmenistanyň Kanuny hem-de Türkmenistanyň Konstitusiýasyny kabul etdi. Şondan bäri ýurdumyzda her ýylyň 18-nji maýy Döwlet baýdagynyň we Konstitusiýanyň güni hökmünde dabaraly bellenilýär. 2026-njy “Garaşsyz, baky Bitarap Türkmenistan - bedew batly at - myradyň mekany” ýylynda Lebap welaýat taryhy we ülkäni öwreniş muzeýiniň hem-de Türkmenistanyň Magtymguly adyndaky Ýaşlar guramasynyň Lebap welaýat Geňeşiniň bilelikde gurnamagynda Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli “Konstitusiýa we Döwlet baýdagy mizemez mukaddeslikdir” atly wagtlaýyn serginiň açylyşy we maslahat duşuşygy geçirildi. Bu geçirilen duşuşykda çykyş edenler ýaşaýşyň ýaşyl reňkini özüne siňdiren, asuda asmanda pasyrdap, rowaç ýollarymyza şugla saçýan ýaşyl tugumyz halkymyzyň arzuw-islegini, göwün maksadyny, parahatçylyk söýüjilikli ýörelgesini äleme buşlaýan beýik mukaddesliklerimiziň biridigini, abadançylygyň we parahatçylygyň nyşany bolan zeýtun baldajyklary, agzybirligi, jebisligi alamatlandyrýan bäş ýyldyz hem-de ýarymaý şekillendirilen, täzelenilişi, ýaşaýşy dabaralandyrýan ýaşyl reňkli Döwlet baýdagymyzyň saýasynda eziz Watanymyz ösüşleriň ýoly bilen öňe barýandygy barada uly buýsanç bilen belläp geçdiler. Özünde halkyň gadymy sungatyny we milli gymmatlyklaryny jemleýän baýdagymyz dünýädäki iň çylşyrymly we çeper bezegli baýdaklaryň biri hasaplanýar. Garaşsyz, hemişelik Bitarap Watanymyzyň berk binýadyny emele getirýän goşa mukaddesligiň – Türkmenistanyň Konstitusiýasynyň hem-de Döwlet baýdagynyň güni gutly bolsun! Goý, toýlarymyz toýlara, baýramlarymyz baýramlara ulaşyp, Gahryman Arkadagymyzyň hem-de hormatly Prezidentimiziň alyp barýan il-ýurt bähbitli beýik işleri elmydama rowaçlyklara beslensin! Ogulgerek AGAJANOWA, Lebap welaýat taryhy we ülkäni öwreniş muzeýiniň uly ylmy işgäri
Muzeýler
06.05.2026Gahryman Arkadagymyzyň, Arkadagly Gahryman Serdarymyzyň taýsyz tagallalary netijesinde, abadançylygyň, parahatçylygyň ýoly bilen ynamly öňe barýan eziz Watanymyz, merdana halkymyzyň yhlasly we tutanýerli zähmeti bilen, ähli ugurlarda üstünliklere beslenýär. Adamzat nesliniň bagtyýar, parahat durmuşda ýaşamagy, döredijilikli zähmet çekmegi, mähriban Watanymyzyň ösüşlere beslenmegi üçin söweşen edermen ýigitlerimiziň söweş meýdanlarynda görkezen deňsiz-taýsyz gahrymançylygyna, nusgalyk edermenligine biz bu gün çäksiz hormat goýýarys. 1941–1945-nji ýyllaryň Beýik Watançylyk urşunda türkmen ýigitleri doganlyk halklaryň wekilleri bilen egin-egne berip, Ýer ýüzünde ynsanyň asuda asmanda, parahat durmuşda ýaşamagynyň hatyrasyna Watan goragyna gitdiler hem-de gahrymançylygyň beýik nusgasyny görkezdiler. Biziň pederlerimiziň geçen gahrymançylykly ýoly watançylygyň, mähriban topraga wepalylygyň hem-de mukaddes Watana gulluk etmegiň mekdebidir.  1941–1945-nji ýyllaryň Beýik Watançylyk urşunda Ýeňiş güni mynasybetli, Türkmenistanyň Döwlet medeniýet merkeziniň Döwlet muzeýinde «Hakyda ýazylan ýatlamalar» atly sergi gurnaldy. Sergini Türkmenistanyň Döwlet medeniýet merkeziniň Döwlet muzeýiniň direktory Meretgeldi Çaryýew açdy. Dabaranyň dowamynda Hormatly il ýaşulusy Orazguly Karataýew şol gazaply uruş ýyllarynda tylda halkymyzyň çeken ýadawsyz zähmeti, türkmen ýigitleriniň watansöýüjiligi, gaýduwsyzlygy, görkezen gahrymançylygy barada täsirli gürrüňleri berdi. Türkmenistanyň Suratkeşler birleşiginiň başlygy Çarymyrat Ýazmyradow çykyşynda suratkeşleriň döredijiliginde batyr, edermen Watan ogullarynyň çeper keşbiniň beýan edilişi barada gürrüň berse, Türkmenistanyň Döwlet çeperçilik akademiýasynyň uly mugallymy, Türkmenistanyň sungatda at gazanan işgäri Azat Annaýewiň, Türkmenistanyň Serhet institutynyň uly leýtenanty Aýhan Durdykylyjowyň, Türkmenistanyň Goranmak ministrliginiň Beýik Saparmyrat Türkmenbaşy adyndaky Harby institutynyň mugallymy, kapitan Myrat Sapargulyýewiň taryhda halkymyzyň dartgynly meseleleri parahatçylykly çözmegiň ýollaryny tapandygy baradaky beren gürrüňleri örän täsirli boldy.
Muzeýler
06.05.20262026-njy ýylyň 13-nji maýynda Türkmenistanyň Beýik Saparmyrat Türkmenbaşy adyndaky Şekillendiriş sungaty muzeýinde «Goşa mukaddesligiň baýramy» ady bilen geçiriljek sergimize tomaşa etmäge çagyrýarys. Sergimiz sagat 11:00-da açylýar. Biziň salgymyz: Aşgabat ş. (A.Nowaýy) 2022. köçesiniň 88-nji jaýy Habarlaşmak üçin tel: 92-71-69
